પાંચ વર્ષના સમયમાં રોડ પાછળ ચાર હજાર કરોડનો ખર્ચ છતાં ૧.૫૩ લાખ ફરિયાદ તંત્રને મળી

  અમદાવાદ,મંગળવાર,25 ફેબ્રુ,2025

અમદાવાદ મ્યુનિસિપલ કોર્પોરેશન દ્વારા નવા રોડ બનાવવાથી લઈ રોડ રિસરફેસ કરવા સહીતની કામગીરી પાછળ પાંચ વર્ષમાં રુપિયા ૪૩૮૩.૧૬ કરોડનો ખર્ચ કરાયો હતો. આમછતાં વિવિધ વોર્ડ વિસ્તારમાંથી રોડ તુટવાથી લઈ  રીસરફેસ કરવા જેવી કુલ ૧.૫૩ લાખ ફરિયાદ મ્યુનિ.તંત્રને ઓનલાઈન કરી હતી. રોડ પ્રોજેકટ દ્વારા પાંચ વર્ષમાં રુપિયા ૨૦૭૮ કરોડનો ખર્ચ કરાયો હતો.

અમદાવાદમાં રોડ સંબંધિત કામગીરી રોડ પ્રોજેકટ વિભાગ ઉપરાંત ઝોનલ કક્ષાએ કરવામાં આવતી હોય છે. મ્યુનિ.બજેટ બેઠકમાં જનરલ બજેટ ઉપરની ચર્ચા સમયે વિપક્ષનેતાએ કહયુ, દરવર્ષે રોડ સંબંધિત કામગીરી કરાવવા કરોડો રુપિયાનો ખર્ચ કરવામાં આવે છે.આમ છતાં વિવિધ વોર્ડમાં બનાવવામા આવેલા નવા રોડ તૂટી જાય છે.વરસાદની મોસમમા વિવિધ રોડ ઉપર બ્રેકડાઉન થાય છે.વર્ષ-૨૦૨૧થી ૨૦૨૪-૨૫ સુધીમાં રોડ પ્રોજેકટ વિભાગ તરફથી રોડની કામગીરી પાછળ રુપિયા ૨૦૭૮ કરોડ, ઝોનલકક્ષાએ રૃપિયા ૫૯૦ કરોડ તથા સ્વર્ણિમની ગ્રાન્ટમાંથી રુપિયા ૧૭૧૪.૮૬ કરોડ મળી કુલ રુપિયા ૪૩૮૩.૧૬ કરોડનો ખર્ચ કરાયો હતો.વરસાદની મોસમમાં વર્ષ-૨૦૨૧-૨૨માં ૪૯,૨૦૨૨-૨૩માં ૭૯,૨૦૨૩-૨૪માં ૧૫૮ તથા ૨૦૨૪-૨૫માં ૫૦  બ્રેકડાઉન થવાની ફરિયાદ મ્યુનિસિપલ તંત્રને મળી હતી.

રોડ સંબંધી ફરિયાદ કયારે-કેટલી?

વર્ષ    ફરિયાદ

૨૦૨૦ ૧૯,૩૫૮

૨૦૨૧ ૨૬,૨૮૫

૨૦૨૨ ૩૧,૮૬૩

૨૦૨૩ ૩૫૨૪૨

૨૦૨૪ ૪૦૬૬૦