સ્વયં વીજળી ઉત્પાદન કરતી વડોદરા-દાહોદ મેમુ ટ્રેનનો આજથી પ્રારંભ

વડોદરા : મધ્ય ગુજરાતના બે મહત્વના કેન્દ્ર વડોદરા અને દાહોદને જોડતી 'મેમુ' ટ્રેનનો મંગળવારથી પ્રારંભ થઇ રહ્યો છે. અદ્યતન ટેકનોલોજી ધરાવતી આ મેમુ ટ્રેન તેની જરૃરીયાતની કુલ વીજળીના ૩૦ ટકા વીજળી તો સ્વયં ઉત્પાદન કરશે તેમ રેલવેના અધિકારીઓએ કહ્યું હતું.

વંદે ભારત ટ્રેન જેવી એર સ્પ્રિંગ ટેકનોલોજીના કારણે મુસાફરોને થડકાનો અનુભવ નહી થાય,પીઆઇએસ અને પીએએસ સુવિધા પણ ધરાવે છે

અદ્યતન સુવિધા ધરાવતી વડોદરા-દાહોદ મેમુ ટ્રેનનો સોમવારથી પ્રારંભ થશે. સોમવારે ઉદ્ઘાટનના દિવસે આ ટ્રેન વડોદરા સ્ટેશનથી સવારે ૯.૩૦ વાગ્યે રવાના થશે અને બપોરે ૧.૨૫ વાગ્યે દાહોદ પહોંચશે. જ્યારે ૨૭ સપ્ટેમ્બર બુધવારથી ટ્રેન નિયમિત રીતે વડોદરા સ્ટેશનથી સવારે ૮.૪૫ વાગ્યે રવાના થશે અને ૧૨.૪૫ વાગ્યે દાહોદ પહોંચશે. દાહોદથી સાંજે ૩.૫૦ વાગ્યે નીકળશે અને સાંજે ૭.૫૫ વાગ્યે વડોદરા પહોંચશે. ટ્રેન બન્ને તરફ છાયાપુરી, પિલોલ, સમલાયા જં., ચાંપાનેર રોડ જં., બાકરોલ, ડેરોલ, ખરસલિયા, ગોધરા જં., કાનસુડી, ચંચલાવ, સંતરોડ, પિપલોદ, લિમખેડા, મંગલ મહુડી, ઉસરા, જેકોટ અને રેંટિયા સ્ટેશન ઉપર રોકાશે. ટ્રેનમાં ફર્સ્ટ ક્લાસ, લેડિઝ કોચ અને જનરલ કોચની સુવિધા ઉપલબ્ધ છે.