મેગ્નેશિયમનું લેવલ ઓછું થવા પર શરીરમાં દેખાય છે આ લક્ષણો, ઈગ્નોર ના કરતા

નવી મુંબઇ,તા. 16 ઓક્ટોબર, સોમવાર 

શરીરને સ્વસ્થ રાખવા માટે આપણને ઘણા પ્રકારના પોષક તત્વોની જરૂર હોય છે. મેગ્નેશિયમ પણ તેમાંથી એક છે. મેગ્નેશિયમ એ એક ખનિજ છે જે શરીર માટે ખૂબ જ મહત્વપૂર્ણ છે, તેથી તેને 'માસ્ટર મિનરલ' કહેવામાં આવે છે. તે સ્નાયુઓ અને હાડકાંને મજબૂત કરવા માટે જરૂરી માનવામાં આવે છે. 

પુખ્ત વ્યક્તિએ દરરોજ 360-410 મિલિગ્રામ મેગ્નેશિયમ લેવું જોઈએ. મેગ્નેશિયમનું સેવન ઓછું કરવાથી શરીરમાં પોષક તત્વોની ઉણપ થાય છે. આજે અમે તમને એવા જ કેટલાક સંકેતો વિશે જણાવવા જઈ રહ્યા છીએ, જે દર્શાવે છે કે શરીરમાં મેગ્નેશિયમની ઉણપ છે.

રાત્રે પગમાં ખેંચાણ - મેગ્નેશિયમની ઉણપના સૌથી સામાન્ય લક્ષણોમાંનું એક છે.

સ્નાયુઓમાં ખેંચાણ આવવા લાગે છે. મેગ્નેશિયમ સ્નાયુ કાર્ય માટે ખૂબ જ મહત્વપૂર્ણ માનવામાં આવે છે. જ્યારે શરીરમાં મેગ્નેશિયમનું સ્તર ઘટે છે, ત્યારે સ્નાયુઓમાં ખેંચાણ અને ખંજવાળ થવા લાગે છે. આ ઘણીવાર રાત્રે થઈ શકે છે.

કામ કર્યા પછી વધુ પડતો થાક- મેગ્નેશિયમની ઉણપને કારણે તમારે થાક અને નબળાઈનો પણ સામનો કરવો પડે છે.  મેગ્નેશિયમની ઉણપને કારણે, શરીરને પૂરતી ઉર્જા ઉત્પન્ન કરવામાં ઘણી મુશ્કેલીઓનો સામનો કરવો પડે છે, જેના કારણે થાક અને નબળાઇ આવે છે.

વારંવાર માથાનો દુખાવો થવો - શરીરમાં મેગ્નેશિયમની માત્રા ઓછી હોવાને કારણે વ્યક્તિને વારંવાર માથાના દુખાવાનીસમસ્યાનો સામનો કરવો પડે છે. જેથી ડૉક્ટર પાસે સલાહ લેવાની જરુર છે.       

અચાનક ભૂખ ન લાગવી- શરીરમાં મેગ્નેશિયમની ઉણપને કારણે ઉલટી થવી, ભૂખ ન લાગવી વગેરે સમસ્યાઓનો સામનો કરવો પડે છે. આના કારણે, પાચન સંબંધી સમસ્યાઓ થવા લાગે છે, જેના કારણે ભૂખ નોંધપાત્ર રીતે ઓછી થઈ જાય છે.

આંખોનું વારંવાર ફડકવુ - મેગ્નેશિયમ સ્નાયુઓને આરામ આપે છે અને તેની ઉણપને કારણે સ્નાયુઓ પર ઘણો તાણ આવે છે.  ઉણપને કારણે આંખો યોગ્ય રીતે આરામ કરી શકતી નથી.

કબજિયાતની સમસ્યા- અન્ય તમામ કાર્યો ઉપરાંત, મેગ્નેશિયમ પણ આંતરડાની ગતિમાં મહત્વપૂર્ણ ભૂમિકા ભજવે છે. મેગ્નેશિયમ આંતરડાની હલનચલનને સરળ બનાવવા માટે આંતરડામાં પાણીની માત્રામાં વધારો કરે છે. શરીરમાં મેગ્નેશિયમની ઉણપને કારણે વ્યક્તિને કબજિયાતની સમસ્યાનો સામનો કરવો પડે છે.

મેગ્નેશિયમની ઉણપને પૂરી કરવા માટે ખાનપાનમાં ઉમેરો આ વસ્તુઓ 

ડાર્ક ચોકલેટ- ડાર્ક ચોકલેટ મેગ્નેશિયમ સહિત ઘણા પોષક તત્વોથી ભરપૂર હોય છે. 'ન્યુટ્રિએન્ટ્સ'માં પ્રકાશિત થયેલા એક રિસર્ચ અનુસાર તેમાં આયર્ન, કોપર અને મેંગેનીઝ પણ વધુ માત્રામાં હોય છે. તેમાં ફ્લેવેનોલ્સ હોય છે તેથી તે હૃદય માટે ફાયદાકારક છે. ઘણા સંશોધનોમાં જાણવા મળ્યું છે કે ફ્લેવેનોલ્સ શરીરમાં ખરાબ કોલેસ્ટ્રોલનું સ્તર ઘટાડતું અને હૃદય રોગનું જોખમ ઘટાડતું એક શક્તિશાળી એન્ટીઑકિસડન્ટ છે.

ડ્રાયફૂટ - નટ્સ આપણા હૃદયના સ્વાસ્થ્ય માટે ખૂબ જ મહત્વપૂર્ણ છે. તેના બળતરા વિરોધી ગુણધર્મો માટે જાણીતા અખરોટ બ્લડ સુગર અને કોલેસ્ટ્રોલના સ્તરને સુધારવામાં પણ મદદ કરે છે તેથી તમારા હૃદયને સ્વસ્થ સુરક્ષિત રાખવા માટે દરરોજ મુઠ્ઠીભર નટ્સનું સેવન કરો.

બીજ- તમારા રોજિંદા આહારમાં મેગ્નેશિયમનો સમાવેશ કરવા માટે ચિયા, સૂર્યમુખી અને કોળાના બીજ ઉત્તમ સ્ત્રોત છે. નેશનલ ઇન્સ્ટિટ્યૂટ ઓફ હેલ્થના ડેટા અનુસાર બીજમાં આયર્ન, મોનોસેચ્યુરેટેડ ફેટ અને ઓમેગા-3 ફેટી એસિડ વધુ હોય છે, જે હૃદયને મજબૂત બનાવે છે.

કેળા- સસ્તા અને સરળતાથી ઉપલબ્ધ કેળા પોટેશિયમનો સારો સ્ત્રોત છે. પોટેશિયમ હૃદય રોગનું જોખમ પણ ઘટાડે છે. તેમાં મેગ્નેશિયમ અને પોટેશિયમ બંને મળી આવે છે તેથી દરેક વ્યક્તિએ રોજ કેળાનું સેવન કરવું જોઈએ.

લીલા શાકભાજી – મેગ્નેશિયમથી સમૃદ્ધ લીલા પાંદડાવાળા શાકભાજી ચોક્કસપણે તમારા રોજિંદા આહારનો એક ભાગ હોવો જોઈએ. તમારી મેગ્નેશિયમની જરૂરિયાતને સરળતાથી પૂરી કરવા માટે મેગ્નેશિયમ ભરપૂર માત્ર પાલક, મેથી, સરસવ, કેળ જેવા શાકભાજી ઉત્તમ છે.