કોલ્ડપ્લેના ચાહકો માટે ખુશખબર: કોન્સર્ટના બે દિવસ માટે મુંબઇ-અમદાવાદ વચ્ચે દોડાવાશે બે ખાસ ટ્રેન

Coldplay Concert In  Ahmedabad: અમદાવાદમાં વિશ્વના સૌથી મોટા નરેન્દ્ર મોદી સ્ટેડિયમ ખાતે આગામી 25મી અને 26મી જાન્યુઆરીના રોજ યોજાનારા કોલ્ડપ્લે કોન્સર્ટની ટિકિટનું વેચાણ શરૂ થયા બાદ અમુક સમયમાં હજારો ટિકિટ વેચાઈ ગઈ હતી. ત્યારે  કોલ્ડપ્લે કોન્સર્ટને ધ્યાનમાં રાખીને પશ્ચિમ રેલવેએ ખાસ ટ્રેન શરૂ કરવાનો નિર્ણય લીધો છે. 25 અને 26 જાન્યુઆરીએ મુંબઈ અને અમદાવાદની વચ્ચે બે ખાસ ટ્રેન ચાલશે.

કોન્સર્ટના બે દિવસ માટે મુંબઇ-અમદાવાદ વચ્ચે દોડાવાશે બે ખાસ ટ્રેન

આ બંને ટ્રેન વહેલી સવારે 6:15 વાગ્યે બાંદ્રા ટર્મિનસ પરથી ઉપડશે અને 25-26 જાન્યુઆરીએ બપોરે બે વાગ્યે અમદાવાદ પહોંચશે. આ જ ટ્રેન બીજા દિવસે અમદાવાદથી મોડી રાતે 1:40 વાગે ઉપડશે અને સવારે 8:40 વાગે બાંદ્રા ટર્મિનસ પહોંચશે. આ બંને ટ્રેન બોરિવલી, વાપી, ઉધના, સુરત, ભરુચ અને વડોદરા સહિતના સ્ટેશનો પર ઊભી રહેશે. 

આ પણ વાંચો: સુરતમાં રેસિંગનો શોખ ભારે પડ્યો, કાર પલટી ખાઇ જતાં 17 વર્ષની વિદ્યાર્થીનીનું મોત, 3ને ઇજા

કોલ્ડપ્લે કોન્સર્ટના આયોજકોને DCPUની નોટિસ

અમદાવાદમાં કોલ્ડપ્લે કોન્સર્ટ યોજાઈ તે પહેલા આયોજકોને નોટિસ પાઠવાઈ હતી. કોલ્ડપ્લે કોન્સર્ટના આયોજકોને ડિસ્ટ્રિક્ટ ચાઈલ્ડ પ્રોટેક્શન યુનિટ (DCPU) દ્વારા નોટિસ ફટકારી હતી. કોન્સર્ટ વખતે જાહેર મંચ પર બાળકોને ન બોલાવવા અંગે નોટિસમાં જણાવ્યું હતું. કોન્સર્ટ દરમિયાન 120 ડેસિબલથી વધુનો અવાજ ઉત્પન્ન થતો હોવાથી બાળકો માટે આટલો અવાજ ઘોંઘાટરૂપ સાબિત થતા તેમના કાન અને મન પર અસર પહોંચે છે. જેને ધ્યાનમાં રાખીને DCPUએ નોટિસમાં બાળકોને ઈયરપ્લગ વગર સ્ટેડિયમમાં પ્રવેશ ન આપવા જણાવ્યું.