એક વર્ષ પહેલા મોટા ઉપાડે શરુ કરાયેલી સાત પૈકી ત્રણ રુટ ઉપર ડબલ ડેકર બસ સત્તાધીશોએ બંધ કરી

  અમદાવાદ,શુક્રવાર,24 જાન્યુ,2025

અમદાવાદ મ્યુનિસિપલ ટ્રાન્સપોર્ટ સર્વિસ દ્વારા એક વર્ષ પહેલાં મોટા ઉપાડે ડબલડેકર બસ શરુ કરવામાં આવી હતી. સાત પૈકી ત્રણ રુટ ઉપર દોડતી ડબલ ડેકર બસ સત્તાધીશોએ બંધ કરી દીધી છે. ડબલ ડેકર બસ બંધ કરવા પાછળ પેસેન્જર મળતા નથી.આવક ઘટી છે એ પ્રકારના બહાનાં આગળ કરાયા છે.

દર વર્ષે કરોડો રુપિયાની ખોટ કરતી મ્યુનિસિપલ ટ્રાન્સપોર્ટ સર્વિસ દ્વારા એક વર્ષ અગાઉ જયારે ડબલ ડેકર બસ શરુ કરવામાં આવી હતી એ સમયે સત્તાધીશોએ પેસેન્જરોને વધુ સારી સગવડ આપવા એ.સી.ડબલ ડેકર બસ શરુ કરાઈ હોવાનો જશ ખાટયો હતો.અણઘડ આયોજનથી શરુ કરવામાં આવેલા ડબલ ડેકર બસ માટેના વિવિધ રૃટ પૈકી લાલદરવાજાથી વસ્ત્રાલ, ઈસનપુરથી રાણીપ તથા ઘુમા ગામથી લાલદરવાજા એમ ત્રણ રુટ ઉપર દોડાવવામાં આવતી ડબલ ડેકર બસ બંધ કરી દેવામાં આવતા મુસાફરોની હાલાકીમાં વધારો થવા પામ્યો છે. વસ્ત્રાલ રુટ ઉપર પેસેન્જર ના મળે એ બાબત શકય જ નથી.આમ છતાં આ રુટ ઉપર દોડાવવામાં આવતી ડબલ ડેકર બસ બંધ કરી દેવામાં આવી છે.જે રુટ ઉપર વધારે સંખ્યામાં મુસાફરો મળે છે એવા રુટ ઉપર ડબલ ડેકર બસ દોડાવવામા આવશે એવી જાહેરાત કરવાવાળા મ્યુનિસિપલ ટ્રાન્સપોર્ટ  સર્વિસ દ્વારા ડબલડેકર બસ શરૃ કરવામાં આવી હતી.હવે આ રુટ ઉપર જ પેસેન્જર મળતા નહીં હોવાનું બહાનુ આગળ કરવામાં આવી રહયુ છે.હાલમાં લાલદરવાજાથી શીલજ,રુટ નંબર-૫૧, વાસણાથી ચાંદખેડા,રુટ નંબર-૪૦૧ તથા સારંગપુરથી સિંગરવા ગામ ,રુટ નંબર-૧૫૦ અને નરોડાથી લાંભા ક્રોસ રોડ,રુટ નંબર-૧૩૦ ઉપર જ ડબલ ડેકર બસ દોડાવાઈ રહી છે.