સુપ્રીમ કોર્ટના ચીફ જસ્ટિસના નામે વૃદ્ધને કર્યા ડિજિટલ અરેસ્ટ, 1.26 કરોડનો ચૂનો લગાવ્યો, 4ની ધરપકડ

Digital Arrest: અમદાવાદના સેટેલાઇટ વિસ્તારમાં રહેતા એક સિનિયર સિટીઝનને સુપ્રીમ કોર્ટના ચીફ જસ્ટિસના નામે બે કરોડ રૂપિયાનું ગેરકાયદેસર ટ્રાન્જેક્શન થયાનું કહીને ડિજિટલ અરેસ્ટ કર્યા બાદ રૂપિયા 1.26 કરોડ રૂપિયાની છેતરપિંડીના કેસમાં સાયબર ક્રાઇમ સેલના અધિકારીઓએ અમદાવાદમાં રહેતા ચાર યુવકોની ધરપકડ કરી છે. ઝડપાયેલા આરોપીઓ ઓનલાઇન છેતરપિંડી કરતી કંબોડિયાની ગેંગ માટે ગુજરાતમાં મોટાપાયે બૅંક એકાઉન્ટ ખોલવાનું કામ કરતા હતા અને વિદેશમાં ક્રિપ્ટો કરન્સી દ્વારા નાણાં ભારતમાંથી વિદેશમાં પહોંચાડવામાં આવતા હતા. 

ઝડપાયેલા ચાર આરોપીઓ છેતરપિંડીના નાણાને ટ્રાન્સફર કરવા માટે મોટા પ્રમાણમાં બૅંક એકાઉન્ટ પૂરા પાડતા હતા

અમદાવાદના સેટેલાઇટ વિસ્તારમાં રહેતા નિવૃત્ત અધિકારીને  25 દિવસ પહેલા અજાણ્યા મોબાઇલ નંબર પરથી  સીબીઆઇ અને સુપ્રીમ કોર્ટ ઑફ ઇન્ડિયાના જસ્ટિસના નામે કોલ આવ્યો હતો. જેમાં તેમને જણાવવામાં આવ્યું હતું કે તેમના નામે બે કરોડ જેટલી રકમના ગેરકાયદેસર વ્યવહાર થયા છે. આ નાણાં આતંકી ફંડના હોવાની શક્યતા છે. જેથી સીબીઆઇએ ગુનો નોંધીને તપાસ શરુ કરી છે. આ કેસમાં સુપ્રીમ કોર્ટમાં રિક્વેસ્ટ કરીને ડિજિટલ અરેસ્ટ કરીને પૂછપરછ થશે. જેથી સિનિયર સિટીઝન ડરી ગયા હતા. 

બાદમાં તેમને વિડીયો કોલથી ડિજિટલ એરેસ્ટ થયાનું કહીને તેમના બૅંક એકાઉન્ટ, ફિક્સ ડીપોઝીટ અને અન્ય રોકાણોની વિગતો મેળવીને આશરે 1.26 કરોડ જેટલી રકમ ચકાસવાનું કહીને અલગ અલગ એકાઉન્ટમાં ટ્રાન્સફર કરાવી હતી. વેરીફીકેશન બાદ 48 કલાકમાં નાણાં પરત આપી દેવાનું કહીને ફોન કટ કરી દીધો હતો. આ કેસની તપાસ સાયબર ક્રાઇમ સેલ દ્વારા શરુ કરવામાં આવી હતી. જેમાં છેતરપિંડીના નાણાં ક્યા ક્યા બૅંક એકાઉન્ટમાં ગયા હતા? તેની તપાસ પીઆઇ ટી આર ગઢવી દ્વારા કરવામાં આવી હતી. 

તપાસમાં અમદાવાદમાં રહેતા મહોમદ હુસૈન જાવેદ અલી, તરૂણસિંહ વાઘેલા, બ્રિજેશ પારેખ અને શુભમ ઠાકર નામના યુવકોને ઝડપી લેવામાં આવ્યા હતા. આ અંગે સાયબર ક્રાઇમના એસીપી  હાર્દિક માકડીયાએ જણાવ્યું કે છેતરપિંડી માટે જે લીંકનો ઉપયોગ કરાયો હતો. તે લીંકનું આઇપી એડ્રેસ કંબોડિયાનું હોવાનું જાણવા મળ્યું છે. ઝડપાયેલા તમામ આરોપીઓ આ ગેંગ સુધી નાણાં પહોંચે તે માટે મોટા પ્રમાણમાં બૅંક એકાઉન્ટ ખોલવાનું કામ કરતા હતા. જેના બદલામાં તેમના કમિશન મળતું હતું. આ ઉપરાંત, આરોપીઓની અન્ય ભૂમિકા તપાસમાં આવી રહી છે.

નવરંગપુરામાં વેપારીને ડિજિટલ અરેસ્ટ કરી 17 લાખ પડાવાયા

નવરંગપુરામાં રહેતા 57 વર્ષીય મનીષ પટેલને થોડા દિવસ પહેલા અજાણ્યા નંબર પરથી કોલ આવ્યો હતો. જેમાં મલેશિયા મોકલેલા પાર્સલમાં ડ્રગ્સ, પાસપોર્ટ, એટીએમ કાર્ડ હોવાનું કહીને કેસ થયો હોવાથી દિલ્હી આવવું પડશે. તેમ કહીને તેમને ડરાવ્યા હતા. જો કે બાદમાં ડિજિટલ અરેસ્ટ કરીને પૂછપરછના બહાને તેમના અલગ અલગ બૅંક એકાઉન્ટથી 17 લાખ રૂપિયા અન્ય એકાઉન્ટમાં ટ્રાન્સફર કરાવીને છેતરપિંડી આચરી હતી. આ અંગે સાયબર ક્રાઇમ સેલ દ્વારા તપાસ શરુ કરવામાં આવી છે.