વસ્ત્રાલ ગામથી થલતેજ સુધી આજે બપોરે ત્રણ કલાક મેટ્રો ટ્રેન નહીં દોડે

  અમદાવાદ,મંગળવાર,12 ડીસેમ્બર,2023

અમદાવાદમાં હાલમાં મેટ્રો ટ્રેન સવારે ૬.૨૦થી રાત્રિના ૧૦ કલાક સુધી દોડાવવામાં આવે છે.કાંકરીયા ઈસ્ટ મેટ્રો સ્ટેશન ટૂંકમાં કાર્યરત કરવામાં આવશે.મેટ્રો રેલ સુરક્ષા કમિશનર ઈસ્ટ-વેસ્ટ કોરિડોરનું નિરીક્ષણ કરવાના હોવાથી આજે બપોરે બેથી સાંજના પાંચ કલાક સુધી વસ્ત્રાલ ગામથી થલતેજ સુધી મેટ્રો ટ્રેન સ્થગિત કરાશે.

ઈસ્ટ-વેસ્ટ કોરીડોરમાં બંને ટર્મિનલ સ્ટેશન (વસ્ત્રાલ ગામ અને થલતેજ)થી છેલ્લી મેટ્રો ટ્રેન પ્રસ્થાનનો સમય બપોરે એક કલાકનો રહેશે.સાંજે પાંચ કલાકથી ઈસ્ટ-વેસ્ટ કોરિડોરમાં મેટ્રો ટ્રેનસેવા હાલના સમયપત્રક મુજબ મળી રહેશે.નોર્થ-સાઉથ કોરિડોર(એ.પી.એમ.સી.થી મોટેરા સ્ટેડિયમ) ઉપર મેટ્રો ટ્રેન સેવા સમયપત્રક મુજબ  આખો દિવસ ચાલુ રાખવામાં આવશે.