ગુજરાતમાં માર્ચના બીજા સપ્તાહમાં ગરમીનો પ્રકોપ વધશે, ઉ.ગુજરાતમાં સૌથી વધુ ગરમી પડવાની સંભાવના

Heat wave Forecast in Gujarat: ઉનાળાની શરુઆત સાથે જ તાપમાનનો પારો ઊંચે જઈ રહ્યો છે. માર્ચ મહિનાની શરુઆતમાં વાતાવરણમાં ભલે મિશ્ર ઋતુનો માહોલ અનુભવાતો હોય પરંતુ એક સપ્તાહ પછી વેસ્ટર્ન ડિસ્ટર્બન્સના કારણે આકરી ગરમીની શરુઆત થવાની છે. તાપમાનનો પારો 35 ડિગ્રીને પાર કરતાં સવારે ઠંડી અને બપોરે ગરમીનો અનુભવ થઈ રહ્યો છે. આગામી દિવસોમાં હોળીનો તહેવાર છે. ત્યારે હોળીના તહેવાર પહેલાં જ ગરમીનો અહેસાસ થવા લાગ્યો છે. હાલમાં બેવડી ઋતુનો અનુભવ થઈ રહ્યો છે. 

ઉત્તર ગુજરાતમાં સૌથી વધુ ગરમી પડવાની સંભાવના 

હવામાન વિભાગની આગાહી મુજબ માર્ચના બીજા સપ્તાહથી ગરમીનો પ્રકોપ વરસવાનો છે જેમાં ઉત્તર ગુજરાતમાં સૌથી વધુ ગરમી પડવાની સંભાવના વ્યક્ત કરાઈ છે. જ્યારે ગરમીના પ્રકોપ વચ્ચે 6થી 15 દિવસ સુધી હિટવેવની અસર રહેવાની છે. અગાઉના ઉનાળાની સરખામણીએ વર્ષ-2025માં ઉનાળાની ગરમીનો પ્રકોપ વધુ રહેશે એવી આગાહી કરવામાં આવી છે. 

બીજા સપ્તાહમાં પારો 42 ડિગ્રીને પાર જશે

ઉત્તર ગુજરાતમાં 14 માર્ચથી ગરમીનો પ્રકોપ વરસવાની આગાહી હવામાન વિભાગ દ્વારા વ્યક્ત કરવામાં આવી છે. માર્ચ મહિનામાં 1થી 5 દિવસ સુધી હિટવેવના કારણે ગરમીનો તીવ્ર અનુભવ થવાનો છે. સામાન્ય રીતે સમગ્ર રાજ્યમાં હિટવેવના 2થી 6 દિવસ રહેતા હોય છે, પરંતુ આ વખતે માર્ચ મહિના દરમિયાન હિટવેવની અસર જોવા મળશે. હવામાન વિભાગ દ્વારા ગત રોજ તેના લાંબાજગાળાના પૂર્વાનુમાનમાં ઉત્તર ગુજરાતમાં 14મી માર્ચથી આકરો ગરમી પ્રકોપ વરસવાની આગાહી કરી છે. જેમાં માર્ચના બીજા સપ્તાહથી તાપમાનનો પારો 42 ડિગ્રીને આંબવાની સંભાવના છે.

જાણો કયાં કેટલું તાપમાન

રાજ્યના મુખ્ય શહેરોના તાપમાનની વાત કરવામાં આવે તો ઉનાળાની શરુઆત થતાં અમદાવાદમાં પારો 35 ડિગ્રીએ પહોંચી ગયો છે, જ્યારે ગાંધીનગરમાં 34.8 ડિગ્રી, ડીસામાં 35 ડિગ્રી, વડોદરામાં 35.2 ડિગ્રી, સુરતમાં 34.1 ડિગ્રી, કંડલામાં 35.3 ડિગ્રી, જ્યારે રાજકોટમાં સૌથી વધુ 36.2 ડિગ્રી તાપમાન નોંધાયું છે.