ચેક રિટર્નના કેસનો ભરાવો, હોળી બાદ 4 નવી કોર્ટ શરૂ કરવા ગુજરાત હાઈકોર્ટનો નિર્ણય

Gujarat High Court: અમદાવાદમાં ધી નેગોશીએબલ ઈન્સ્ટ્રુમેન્ટ એક્ટ હેઠળના ચેક રિટર્નના કેસોના નોંધપાત્ર વધારો થયો છે. જેને લઈને આ કેસોના ઝડપી અને અસરકારક નિકાલ માટે ગુજરાત હાઈકોર્ટ દ્વારા અપનાબજાર બહુમાળી બિલ્ડીંગ ખાતે ચેક રિટર્નના કેસની વધારાની ચાર નવી કોર્ટો શરૂ કરવાનો નિર્ણય લેવાયો છે. 

મેટ્રો કોર્ટના જજ ત્યાં ટ્રાન્સફર થતાં તેમની જગ્યાઓ ખાલી પડશે

નવી ચાર કોર્ટો હોળી પછી 17મી માર્ચથી ધમધમતી થઈ જશે. જો કે, ચેક રિટર્નના કેસોની નવી કોર્ટોમાં હાલની ઘી કાંટા સ્થિત ફોજદારી કોર્ટ(મેટ્રો.કોર્ટ)ના જજો ત્યાં ટ્રાન્સફર થતાં તેમની જગ્યા ખાલી પડશે. તેથી આ સબંધિત મેટ્રો કોર્ટની કામગીરીને અસર થશે. અલબત્ત, અરજન્ટ ચાર્જની કામગીરીને પહોંચી વળવા આ મેટ્રો કોર્ટનો ચાર્જ અન્ય કોર્ટોને આપવામાં આવ્યો છે. પરંતુ તેમછતાં રૂટીન કામગીરીને અસર થશે તે નક્કી છે. 

ચેક રિટર્નના કેસોની નવી ચાર કોર્ટો ઉમેરાતાં કુલ કોર્ટ 18 થશે

અમદાવાદ ક્રિમીનલ કોર્ટ બાર એસોસિએશનના પૂર્વ એક્ઝીક્યુટીવ મેમ્બર બ્રિજ અનિલ કેલ્લાએ જણાવ્યું હતું કે, 'ચેક રિટર્નના કેસોનું ભારણ  ઘટાડવા અને પડતર કેસોના ઝડપી અને અસરકારક નિકાલના ઉમદા આશયથી ગુજરાત હાઇકોર્ટ દ્વારા ચાર નવી કોર્ટો અપનાબજાર બહુમાળી બિલ્ડીંગ, લાલ દરવાજા ખાતે શરૂ કરવાનો નિર્ણય લેવાયો છે, તેનાથી કેસોનું ભારણ નિશંકપણે ઘટશે. ધી નેગોશીએબલ ઇન્સ્ટ્રુમેન્ટ એકટ હેઠળના ચેક રિટર્નના કેસોની હાલ કુલ 12 કોર્ટો આવેલી છે, જે તમામ અપનાબજાર, બહુમાળી બિલ્ડીંગમાં જ કાર્યરત છે. આ ઉપરાંત બે ઓનલાઈન કોર્ટો થોડા સમય પહેલાં જ શરૂ કરવામાં આવી હતી અને હવે આ નવી ચાર કોર્ટો ઉમેરાશે એટલે કે, ચેક રિટર્નના કેસોની કુલ કોર્ટ 18 થશે.'

આ પણ વાંચો: હોળી એક તેના નામ અનેક, જાણો કેવી રીતે હોલિકા અને હોળી શબ્દ આવ્યો અસ્તિત્વમાં ?

તેમણે વધુમાં ઉમેર્યું કે, 'આ નવી કોર્ટમાં જજીસ ઘી કાંટા ફોજદારી કોર્ટમાંથી કોર્ટ નંબર 6, 8, 10, 12 અને 39ના મેટ્રોપોલીટન મેજિસ્ટ્રેટને ચેક રિટર્નની કોર્ટોમાં મૂકવામાં આવ્યા છે. એટલે મેટ્રો કોર્ટમાં તેમની જગ્યા ખાલી પડશે. અલબત્ત, આકોર્ટોનો ચાર્જ અન્ય ત્રણ કોર્ટને સોંપવામાં આવ્યો છે. જો કે, વારેઘડીયે કેસો ટ્રાન્સફર કરવાને લઈ વકીલો અને પક્ષકારોને પણ ભારે અગવડ પડતી હોય છે અને રૂટીન કોર્ટ કામગીરીને પણ અસર થતી હોય છે, તેથી સત્તાધીશોએ આ મામલે પણ તાત્કાલિક યોગ્ય નિર્ણય લેવો જોઈએ.'

રાજ્યમાં સૌથી વધુ ચેક રિટર્નના 3.75 લાખ કેસો અમદાવાદમાં પેન્ડિંગ 

અમદાવાદ સહિત રાજ્યની જુદી જુદી ચેક રિટર્નના કેસોની કોર્ટોમાં લાખો કેસો પેન્ડીંગ બોલી રહ્યા છે, જેમાં આખા રાજ્યમાં સૌથી વધુ કેસ અમદાવાદમાં આશરે 3.75 લાખથી વધુ કેસો ચેક રિટર્નના ઘણાં સમયથી પડતર બોલી રહ્યા છે. નોંધનીય વાત એ છે કે, રાજયમાં ચેક રિટર્નના જે કુલ પડતર કેસો છે, તેમાં એકલા અમદાવાદમાં જ આશરે 60 ટકા કેસો તો પડતર છે.