કફ શીરપ વેચવા આવેલો શખ્સ ૨૮૫ બોટલના જથ્થા સાથે પકડાયો

અમદાવાદ,બુધવાર

પૂર્વ વિસ્તારમાં યુવા વર્ગમાં નશાકારર પદાર્થોનું સેવન વધતું જાય છે. અગાઉ ઇસનપુર પોલીસે ડ્રગ્સ સહિતની કેફી દ્વવ્યનો જથ્થો પકડયો હતો ત્યારે આજે સવારે દાણીલીમડા પોલીસે ચોક્કસ બાતમી આધારે આજે વહેલી પરોઢે નશા કારક કફ શીરપના ૨૮૫ બોટલના રૃા. ૫૨,૭૨૫ના જથ્થા સાથે આરોપીને પકડી લીધો હતો. પૂછપરછ કરતાં આ કફ શીરપ તે જુહાપુરાના શખ્સ પાસેથી વેચવા માટે લાવ્યો હોવાની કબૂલાત કરી હતી. આ બનાવ અંગે દાણીલીમડા પોલીસે બે લોકો સામે ગુનો નોંધી એકની ધરપકડ કરી વધુ તપાસ હાથ ધરી છે.

પોલીસે વહેલી પરોઢે વોચ ગોઠવી ઢોર બજાર ચાર રસ્તાથી દાણીલીમડામાંથી નશાકારક કફ શીરપ જથ્થા સાથે આરોપીને  દબોચી લીધો, જુહાપુરાના શખ્સ પાસેથી બોટલો લાવ્યો હોવાની કબૂલાત

દાણીલીમડા પોલીસને ચોક્કસ બાતમી મળી હતી કે એક શખ્સ ઢોર બજાર પાસે નશાકારક કફ શીરપ વેચવા માટે આવવાનો છે, પોલીસે આજે સવારે ૪.૧૫ વાગે જમાલપુરમાં રહેતા યુવકને શંકા આધારે પકડીને તેની તલાસી લેતા તેની પાસેથી કોડીન ફોસ્ફેટ નશાકારક કફ શીરપની ૨૮૫ બોટલો રૃા. ૫૨,૭૨૫ની પકડી લીધી હતી. 

પોલીસે તપાસ કરતાં આરોપીએ જુહાપુરમાં અંબર ટાવર પાસે રહેતા શખ્સ પાસેથી વેચવા માટે લાવ્યો હોવાની કબુલાત કરી હતી.આ ઘટના અંગે દાણીલીમડા પોલીસે બે લોકો સામે ગુનો નોંધી એકની ધરપકડ કરી વધુ તપાસ હાથ ધરી છે.