ગુજરાતમાં એક વર્ષમાં કૂતરું કરડવાના કેસ 40 ટકા વધ્યા

ગુજરાતમાં શ્વાન કરડવાના કેસમાં ચિંતાજનક રીતે વધારો થઇ રહ્યો છે. આ વર્ષે જ શ્વાન કરડવાના 2.41 લાખ કેસ સામે આવ્યા છે. આમ, દરરોજ સરેરાશ 700થી વધુ લોકો શ્વાન કરડવાની સમસ્યાનો શિકાર બને છે. 

આ વર્ષે શ્વાન કરડવાના સૌથી વધુ કેસમાં મહારાષ્ટ્ર મોખરે, ગુજરાત 2.41 લાખ સાથે પાંચમાં સ્થાને

આ અંગે પ્રાપ્ત માહિતી અનુસાર  ગુજરાતમાં ગત વર્ષની સરખામણીએ આ વર્ષે શ્વાન કરડવાના કેસમાં 40 ટકાથી વધુનો વધારો નોંધાયો છે. વર્ષ 2022માં ગુજરાતમાં શ્વાન કરડવાના કુલ 1,69,261 કેસ નોંધાયા હતા. જેની સરખામણીએ આ વર્ષે 2,41,846 કેસ નોંધાઇ ચૂક્યા છે. આ વર્ષે શ્વાન કરડવાના સૌથી વધુ કેસ નોંધાયા હોય તેવા રાજ્યમાં મહારાષ્ટ્ર ૪.૩૫ લાખ સાથે મોખરે, તેલંગાણા 4.04 લાખ સાથે બીજા અને ગુજરાત પાંચમાં સ્થાને છે. 

રાહતની વાત એ છે કે ગુજરાતમાં શ્વાન કરડવાના કેસમાં 2020 બાદ ઘટાડો થઇ રહ્યો છે. 2018થી 2020 દરમિયાન ગુજરાતમાં કૂતરા કરડવાના 4 લાખથી વધુ કેસ નોંધાતા હતા. વર્ષ 2018થી વર્ષ 2023 સુધી ગુજરાતમાં શ્વાન કરડવાના કુલ 20.80 લાખ કેસ નોંધાઇ ચૂક્યા છે.

ગુજરાતમાં ડોગ બાઇટના છેલ્લા 6 વર્ષમાં કેસ

 વર્ષ              કેસ

2018 4.55 લાખ

2019 4.80 લાખ

2020 4.42 લાખ

2021 2.90 લાખ

2022 1.69 લાખ

2023 2.41 લાખ