અમદાવાદમાં નવો રોડ બનાવવા કિમી દીઠ 4.77 કરોડનો ખર્ચ, અધધ રૂપિયા ખર્ચવા છતાં રસ્તા મહિનો પણ ટકતા નથી

Ahmedabad Municipal Corporation Budget: અમદાવાદ શહેરમાં મ્યુનિ. કોર્પોરેશન દ્વારા કરવામાં આવતા રસ્તાના કામ લોકોમાં કાયમી માટે ચર્ચાનું કેન્દ્ર રહે છે. કારણ કે ચોમાસામાં નવા બનેલા રસ્તાઓ પણ તૂટી જાય છે. જ્યારે ગટર અને પાણીની લાઇન માટે મનફાવે ત્યારે આડેધડ નવા રસ્તાઓ ખોદી નાખવામાં આવે છે. 

આ સ્થિતિ વચ્ચે બહાર આવતી વિગતો અનુસાર એક કિલોમીટર નવો રસ્તો બનાવવા માટે મ્યુનિ. દ્વારા સરેરાશ રૂ.4.77 કરોડની અધધ રકમનો ખર્ચ કરવામાં આવે છે! આગામી વર્ષના રજૂ થયેલા અંદાજ પત્રમાં ખુદ મ્યુનિ. તંત્રએ જ આ આંકડા રજૂ કર્યા છે. આટલી મોટી રકમ ચૂકવીને બનાવેલા રસ્તા ગણતરીના મહિનાઓ પણ ચાલતા નથી. અમદાવાદ મ્યુનિ. કોર્પોરેશનનું વર્ષ 2025-26નું બજેટ તાજેતરમાં મ્યુનિ. કમિશન દ્વારા રજૂ કરવામાં આવ્યું છે. આ બજેટમાં મ્યુનિ.ની ગત નાણાકીય વર્ષ 2024-25 ની ઉપલબ્ધીઓ વર્ણવી છે. 

જેમાં દર્શાવવામાં આવેલા આંકડા અનુસાર એક વર્ષમાં કુલ 325 કિલોમીટરની લંબાઈના જુદા જુદા 445 રસ્તા બનાવવા માટે રૂ.1552 કરોડનો ખર્ચ કરાશે. જેમાં બિટયુમીન એટલે કે ડામર રોડ, વ્હાઈટ ટોપિંગ એટલે કે આરસીસી રોડ અને ડસ્ટ ફ્રી રસ્તાનો સમાવેશ થાય છે. 

અગાઉના નાણાકીય વર્ષ 2023-24 માં રસ્તાના કામ માટે કુલ રૂ. 899 કરોડનો ખર્ચ કરવામાં આવ્યો હતો. તેમાં રૂ. 653 કરોડનો વધારો ગત વર્ષમાં કરાયો છે. આ આંકડાનો હિસાબ કરતાં સરેરાશ એક કિલોમીટરનો રસ્તો બનાવવા માટે મ્યુનિ. તંત્ર દ્વારા રૂ. 4.77 કરોડની તોતિંગ રકમ ચૂકવવામાં આવે છે. આટલી અધધ રકમ ચૂકવાયા બાદ પણ અનેક રસ્તા ચોમાસાના પ્રથમ વરસાદથી જ તૂટવા માંડે છે. 

વરસાદી ઋતુ પુરી થાય ત્યાં સુધી તો સંખ્યાબંધ રસ્તા બિસ્માર બની જાય છે. આટલું અધુરૂ હોય હોય તેમ ખાસ કરીને પૂર્વ અમદાવાદમાં ગટર, પાણીની લાઇનો નવી નાખવા કે સમારકામ માટે ગમે ત્યારે રસ્તા ખોદી નાંખવામાં આવે છે. વિકાસ કામો માટે ખોદકામ જરૂરી છે, પરંતુ નવો રસ્તો બને તે પહેલાં વિવિધ વિભાગો વચ્ચે સંકલન સાધીને ગટર, પાણી, લાઇટના કામ પહેલાં પુરા કરી લેવામાં આવે તો મોંઘાદાટ રસ્તા ખોદવાની નોબત આવે નહી અને લોકોના પરસેવાની કમાણીના ખર્ચાયેલા પૈસાનું શહેરીજનોને પુરતું વળતર મળી શકે છે. પરંતુ પોતાના ખિસ્સામાંથી પૈસા ખર્ચાતા ન હોવાથી અધિકારીઓને આવું સંકલન કરવાનું સૂઝતું નથી.