Gujarat Citiesઅમદાવાદ એરપોર્ટ રોડ પર પૂરપાટ દોડતી કાર બેકાબૂ, ડિવાઈડર કૂદી રિક્ષામાં ઘૂસી, 4 ઈજાગ્રસ્ત
Updated: Apr 6th, 2025
Ahmedabad Accident: અમદાવાદમાં રવિવારે (6 એપ્રિલ) વહેલી સવારે એરપોર્ટ રોડ પર ડફનાળા ચાર રસ્તા પાસે અકસ્માત સર્જાયો હતો. જેમાં એક રિક્ષાચાલક સહિત ચાર શખસ ઈજાગ્રસ્ત થયા હતાં. ઈજાગ્રસ્તોને તાત્કાલિક ધોરણે હોસ્પિટલ ખસેડવામાં આવ્યા હતાં.
શું હતી ઘટના?
મળતી માહિતી મુજબ, અમદાવાદમાં રવિવારે (6 એપ્રિલ) વહેલી સવારે એરપોર્ટ પર ડફનાળા જંક્શન નજીક પૂરપાટ ઝડપે કાર ચાલી રહી હતી, ત્યારે અચાનક ડ્રાઇવરે કાબૂ ગુમાવતા કાર રોડ ડિવાઇડર કૂદીને ઓટોરિક્ષા સાથે અથડાઈ હતી. ટક્કર એટલી ભયાનક હતી કે, કાર પલટી ગઈ અને તેનું એન્જિન ફાટી ગયું અને બાદમાં કારમાં આગ પણ લાગી ગઈ હતી.
ચાર શખસ થયાં ઈજાગ્રસ્ત
અકસ્માતમાં ત્રણ મુસાફરો પાર્થ મેવાડા, યશ અમીન અને અમિત ભરવાડ નામના વ્યક્તિ ઈજાગ્રસ્ત થયા હતાં હજુ એક વ્યક્તિની ઓળખ થઈ શકી નથી. ચારેયને હાલ હોસ્પિટલ ખાતે સારવાર લઈ રહ્યા છે.
સદનસીબે વાહનમાં આગ લાગે તે પહેલાં જ ત્યાંથી પસાર થતાં લોકોએ કારમાં સવાર લોકોને બચાવી દીધા હતાં. બાદમાં શાહીબાગ ફાયર વિભાગની ટીમ ઘટનાસ્થળે પહોંચી આગ ઓલવી દીધી હતી.
