કોલ્ડપ્લેની ૪૦ ટિકીટો સાથે ઝડપાયેલા યુવકોને કાર્યવાહી કર્યા વિના છોડી દેવાયા!

અમદાવાદ,શનિવાર

અમદાવાદમાં કોલ્ડપ્લે મ્યુઝીક કોન્સર્ટને લઇને સૌથી વધારે ટિકીટોનું કાળા બજાર કરવામાં આવી રહ્યું છે. ત્યારે પોલીસ કમિશનરે ટિકિટની કાળાબજારી કરતા તત્વો સામે આકરી  કાર્યવાહી કરવા માટે સુચના આપી હતી. જે અનુસંધાનમાં અનેક ગુના નોંધવામાં આવ્યા હતા. પરતુ, શુક્રવારે સાંજના સમયે એસ જી હાઇવે પર આવેલી એક હોટલમાં ત્રણ યુવકો કોલ્ડ પ્લેની ૪૦ ટિકિટો સાથે ઝડપાયા હતા. જો કે  પોલીસે કોઇ કારણસર તમામ યુવકો સામે કાર્યવાહી કરવાને બદલે જવા દીધા હતા. આ સમગ્ર ઘટના આનંદનગર પોલીસ સ્ટેશનની હદમાં બની હતી. શહેરના એસ જી હાઇવે નજીક આવેલી એક હોટલના નવમા માળે કેટલાંક યુવકો કોલ્ડપ્લેનો કોન્સર્ટ જોવા માટે આવ્યા હોવાથી રોકાયા હતા.

જો કે તે યુવકો સોશિયલ મિડીયા પર ગ્રાહકોનો સંપર્ક કરીને ૧૨૫૦૦ની  ટિકીટ ૨૦ હજારમાં વેચાણ કરતા હોવાની જાણ પોલીસને થઇ હતી. જેના આધારે પોલીસે દરોડો પાડીને ત્રણેય યુવકો પાસેથી ૪૦ ટિકીટો જપ્ત કરી હતી. ઝડપાયેલા યુવકોમાં એક યુવક દિલ્હીનો, એક યુવક  મુંબઇનો અને એક યુવક દિલ્હીનો રહેવાસી અને અન્ય એક યુવક ઓસ્ટ્ેલિયાનો હતો.  આ યુવક પૈકીનો એક રાજકીય પીઠબળ ધરાવતો હોવાથી પોલીસે કોઇપણ કેસ નોંધ્યા વિના જવા દીધા હોવાની ઘટના બની હતી. સુત્રોના જણાવ્યા મુજબ આ સમગ્ર ઘટના આનંદનગર પોલીસ સ્ટેશનની હદમાં બની હતી.