AMCની નવી SOP: ભૂવો પડશે કે જમીન બેસી જશે તો કોન્ટ્રાક્ટરે તેમના ખર્ચે રિપેરિંગ કરાવવું પડશે
Updated: Jan 21st, 2025
Ahmedabad Municipal Corporation: અમદાવાદ મ્યુનિસિપલ કોર્પોરેશન દ્વારા વિવિધ રોડ ઉપર થતા સેટલમેન્ટ એટલે કે ભૂવા પડવા તથા જમીન બેસી જવાની બાબતને લઈ સ્ટાન્ડર્ડ ઓપરેટિંગ પ્રોસિજર (SOP) જાહેર કરી છે. આ કારણથી હવે શહેરના કોઈપણ રોડ પર ભૂવો પડશે કે જમીન બેસી જશે તો તેની સંપૂર્ણ જવાબદારી જે તે સ્થળે કામ કરનાર કોન્ટ્રાકટર કે એજન્સીની રહેશે. હવે તેમણે જ રોડ પર પડેલા ભૂવાનું તાકીદે સમારકામ કરાવવું પડશે. આ માટે મ્યુનિસિપલ કોર્પોરેશન કોઈ અલગથી રકમ ચૂકવશે નહીં.
તંત્ર તરફથી સ્ટાન્ડર્ડ ઓપરેટીંગ પ્રોસીજરનો અમલ કરવા નિર્ણય
અમદાવાદ મ્યુનિસિપલ કોર્પોરેશન દ્વારા પાણી, ગટર અને વરસાદી પાણીના નિકાલ માટે નાંખવા ખોદાણ કરેલી જગ્યા તેમજ જીઓ, એરટેલ જેવી ટેલિકોમ કંપનીઓ તથા યુ.જી.વી.સી.એલ. જેવી તથા વીજ કંપનીઓ જેવી અન્ય એજન્સીઓને વિવિધ કામગીરી કરવા રોડ ઓપનિંગની મંજૂરી મ્યુનિસિપલ તંત્ર તરફથી આપવામાં આવે છે. યુટિલિટી માટે ખોદકામ કરેલી જગ્યાએ રિફિલિંગ કરવાની કામગીરીમાં એકસૂત્રતા જળવાઈ રહે, તે માટે તંત્ર તરફથી સ્ટાન્ડર્ડ ઓપરેટિંગ પ્રોસિજરનો અમલ કરવા નિર્ણય કરાયો છે.
આર.ઓ.પરમીશન લેતા પહેલાં બાંહેધરી પત્ર આપવુ
હવે કોઈપણ સ્થળે કામગીરી કરતા પહેલાં અન્ડરગ્રાઉન્ડ યુટિલિટીનો સર્વે કરી ટ્રાયલ પીટ લઈ કામગીરી શરૂ કરાશે. બેરિકેડ્બેસ દૂર કરતા પહેલાં માટી, કાટમાળ કે અન્ય મટિરિયલ રોડ ઉપરથી સફાઈ કર્યા બાદ જ દૂર કરાશે. તમામ સર્વિસ પ્રોવાઈડરો જે મ્યુનિસિપાલિટી પાસેથી રોડ ઓપનિંગની મંજૂરી લઈને કામગીરી કરે છે, તે તમામે રોડ ઓપનિંગની મંજૂરી લેતા પહેલાં બાંહેધરી પત્ર આપવો પડશે.
બેરીકેડીંગની તમામ બાજુએ ચેતવણીનુ ચિહ્ન લગાવવું
આ કામગીરી શરૂ કરતા પહેલા ટ્રાફિક ડાયવર્ઝન સહિતની બાબતનો સેફટી પ્લાન બનાવવાનો રહેશે. બેરિકેડ્સની તમામ બાજુ ચેતવણીનુ ચિહ્ન ઉપરાંત એજન્સીની વિગત, સેફટી એન્જિનિયરના સંપર્કની વિગતો સ્થળ પર દર્શાવવી પડશે. આ કામગીરી દરમિયાન સ્થળ પર વધારાનું મટિરિયલ દૂર કરવાનું રહેશે, જેથી નાગરિકોને વાહન વ્યવહારમાં તકલીફ ના પડે.
