અમદાવાદીઓ વધુ બે દિવસ માણી શકશે ફ્લાવર શોની મજા, જાણો સમય અને ટિકિટ

Ahmedabad International Flower Show 2025: અમદાવાદ મ્યુનિસિપલ કોર્પોરેશન દ્વારા દર વર્ષે જાન્યુઆરી મહિનાના સમયગાળા દરમિયાન સાબરમતી રિવરફ્રન્ટ પર ફ્લાવર શોનું આયોજન કરવામાં આવે છે. ચાલુ વર્ષે ગત 3 જાન્યુઆરી 2025થી ઈન્ટરનેશનલ ફ્લાવર શો શરૂ થયો હતો. જે ગત 22 જાન્યુઆરી સુધી ચાલું રહેવાનો હતો. આ પછી લોકોની માગને કારણે AMCએ 23 અને 24 જાન્યુઆરીએ પણ ફ્લાવર શો શરૂ રાખવાનું નક્કી કર્યું હતું. ત્યારે હવે AMCના સૂત્રો દ્વારા મળતી માહિતી પ્રમાણે આજે અને આવતીકાલે એટલે કે, 25 અને 26 જાન્યુઆરીએ ફ્લાવર શો શરૂ રહેશે.

આ પ્રમાણે રહેશે ટાઈમ અને ટિકિટ

ઈન્ટરનેશનલ ફ્લાવર શોમાં પ્રવેશ માટે 12 વર્ષથી ઉપરના પ્રત્યેક વ્યક્તિ માટે સોમવારથી શુક્રવાર દરમિયાન 70 રૂપિયા અને શનિવાર-રવિવાર દરમિયાન 100 રૂપિયા ફી ચૂકવવાની રહેશે. આ ઉપરાંત ફ્લાવર શોમાં VIP સમય પણ નક્કી કરવામાં આવ્યો છે. જેનો સમય સવારે 9 થી 10 અને રાત્રે 10 થી 11 નો રહેશે. આ સમયગાળા દરમિયાન જે લોકોને ફ્લાવર શો જોવા જવુ હોય તેવા માટે પ્રત્યેક વ્યક્તિ દીઠ રૂપિયા 500 ફી નક્કી કરવામાં આવી છે. 

શું તમે ફ્લાવર શોની મુલાકાત લીધી ?

અમદાવાદ ઈન્ટરનેશનલ ફલાવર શો ૨૬ જાન્યુઆરી સુધી જ રહેશે.

જો મુલાકાત બાકી હોય તો, આ તક હવે ચૂકશો નહીં.#amc #amcforpeople #AhmedabadFlowerShow2025 #TechMeetsNature #FlowerShowInnovation #BloomingAhmedabad #FloralFestivities #ExploreAhmedabad… pic.twitter.com/HodWZfALkJ

— Amdavad Municipal Corporation (@AmdavadAMC) January 25, 2025

ફ્લાવર શો 2025 માં 15 કરોડ ખર્ચ થશે

અમદાવાદ મ્યુનિસિપલ કોર્પોરેશન દ્વારા દર વર્ષે જાન્યુઆરી મહિનામાં ફ્લાવર શો 2025નું આયોજન કરવામાં આવ્યું છે. જેમાં દર વર્ષ કરતા આ વર્ષે ફ્લાવર શોમાં સ્કલપચર અને સ્ટ્રક્ચર્સની સંખ્યામાં વધારો કરવામાં આવ્યો છે. 2024માં 9.72 લાખ લોકોએ ફ્લાવર શો નિહાળ્યો હતો. જ્યારે વર્ષ 2025 માં ફ્લાવર શો માટે 15 કરોડ ખર્ચનો અંદાજ છે.