કીડીને ભાવે ચાંદો! .

- કિરીટ ગોસ્વામી

કીડીએ સ્કૂલમાં,ટીચર પાસેથી ગીત સાંભળ્યું...

'ગોળ-ગોળ ચાંદો!

મીઠો-મીઠો ચાંદો!

ધોળો-ધોળો ચાંદો!

સહુને વ્હાલો ચાંદો!'

ઘેર આવીને એ તો મમ્મીને કહેવા લાગી- 'મમ્મી, મારે ચાંદો ખાવો છે!'

મમ્મી બોલ્યાં -'ના,ના, ચાંદો ન ખવાય!'

કીડી કહે- 'ના, મારે તો ચાંદો ખાવો જ છે!'

ટીચરે કહ્યું- 'ચાંદો ખૂબ મીઠો હોય છે!'

મમ્મી બોલ્યાં- 'હા, એ મીઠો જરૂર છે પણ ખાવા માટે નથી!'

કીડીએ જિદ્દ કરી- 'ના, મારે તો ખાવો છે!

'મીઠો-મીઠો ચાંદો !

મારે ખાવો ચાંદો!

મમ્મી, આપ, ચાંદો!

મારે ખાવો ચાંદો!'

મમ્મીએ કહ્યું- 'પણ ચાંદો તો ખૂબ દૂર-દૂર છે! આપણે ધરતી પર છીએ! ને ચાંદો તો આકાશમાં છે!'

'તો આકાશમાંથી લાવી દે, ચાંદો!' કીડીએ લાડ કરતાં કહ્યું.

 મમ્મીએ ઘડીવાર વિચારીને કહ્યું- 'તને હું તારા જેવો નાનકડો ચાંદો ખાવા આપું તો ચાલશે?'

કીડીએ પૂછયું- 'એ વળી કેવો?'

મમ્મી બોલ્યાં- 'મીઠો-મીઠો અને નાનો-નાનો ચાંદો!'

 'હા, તો આપ ને જલદી!' કીડીએ કહ્યું.

મમ્મીએ એક સરસ પતાસું આપતાં કીડીને કહ્યું - 'લે,આ રહ્યો નાનકડો ચાંદો! એને ખા!' 

કીડીએ પતાસું ચાખ્યું. એ તેને બહુ ભાવ્યું! રાજી થઇને એ તો ગાવા લાગી-

'મમ્મીએ આપ્યો ચાંદો!

નાનો-નાનો ચાંદો!

મેં ખાધો ચાંદો!

મને ભાવ્યો ચાંદો!

મીઠો-મીઠો ચાંદો!'