લીંબડીમાંથી ચોરી કરેલી 3 બાઈક સાથે બે શખ્સો ઝડપાયા

- સુરેન્દ્રનગર અને અમદાવાદની બાઈકચોરીનો ભેદ ઉકેલાયો

સુરેન્દ્રનગર : સુરેન્દ્રનગર એલસીબીએ સુરેન્દ્રનગર અને અમદાવાદમાંથી ચોરી કરેલા ત્રણ બાઈક સાથે બે બાઈકચોરોને ઝડપી પાડી કાયદેસરની કાર્યવાહી હાથ ધરી છે. 

સુરેન્દ્રનગર એલસીબી ટમે લીંબડીની વિષ્ણુનગર સોસાયટીમાંથી વિજયભાઈ ઉર્ફે બાડો હેમુભાઈ મકવાણાને ઝડપી પાડયો હતો. તેની પુછપરછ કરતા તેણે પોતાના મિત્ર મયુરભાઈ અશોકભાઈ રાઠોડ સાથે મળી સુરેન્દ્રનગરના ઉપાસના સર્કલ પાસેથી એક બાઈકની ચોરી કરી હોવાની કબુલાત કરી હતી.

 તેમજ ચોરેલી બાઈક વિષ્ણુભાઈ ઉર્ફે હકાભાઈને રૂા.૧૭,૦૦૦માં વેચી દીધું હોવાનું જણાવતા પોલીસે વિષ્ણુભાઈને પણ ઝડપી પાડી તેની પુછપરછ કરતા ચોરેલી બાઈક સિવાય અન્ય બાઈક મયુરભાઈ ઉર્ફે બીટ્ટુએ ચોરી કરી સંતાડયું હોવાનું જણાવતા તેને પણ ચોરીના બે બાઈક સાથે ઝડપી પાડયો હતો. જ્યારે અન્ય બે બાઈક અમદાવાદ શહેરી વિસ્તારમાંથી ચોરી કરી હોવાની કબુલાત કરી હતી.