ચાણપા ગામના પાટિયા પાસે અચાનક કારમાં આગ લાગતા દોડધામ

- ચોટીલા-રાજકોટ હાઈવે ઉપર

- કારમાં સવાર તમામ પાંચ વ્યક્તિઓ બહાર નીકળી જતા જાનહાનિ ટળી : કાર બળીને ખાક

સુરેન્દ્રનગર : ચોટીલા રાજકોટ હાઈવે પર ચાણપા ગામના પાટિયા પાસે અચાનક કારમાં આગ લાગતા દોડધામ મચી જવા પામી હતી. સદનસીબે કોઈ જાનહાનિ ટળી હતી પરંતુ, આગમાં કાર બળીને ખાક થઈ હતી.

સુરેન્દ્રનગર જિલ્લામાંથી પસાર થતા અમદાવાદ-રાજકોટ નેશનલ હાઈવે સહિત મુખ્ય માર્ગો પર કાર સહિત વાહનો સળગી ઉઠવાના બનાવો વધી રહ્યાં છે. ત્યારે ચોટીલા-રાજકોટ હાઈવે પરથી કારમાં સવાર ચારથી પાંચ લોકો પસાર થઈ રહ્યાં હતાં. તે દરમ્યાન અચાનક કોઈ કારણોસર કાર ચાણપા ગામના પાટિયા પાસે પહોંચતા કારમાં આગ લાગતા સળગી ઉઠી હતી. જો કે કારચાલક સહિત કારમાં સવાર તમામ લોકો સમય સુચકતા વાપરી કારમાંથી બહાર નીકળી જતા તમામનો આબાદ બચાવ થયો હતો. ગણતરીની મીનીટોમાં જ કાર બળીને સંપૂર્ણ ખાક થઈ ગઈ હતી. આ બનાવને પગલે લોોકોના ટોળેટોળાં ઘટના સ્થળે ઉમટી પડયા હતા તેમજ ટ્રાફિકજામના દ્રશ્યો પણ સર્જાયા હતા. પોલીસે સ્થળ પર પહોંચી ટ્રાફિકને હળવો કરી વાહનવ્યવહાર પૂર્વવત કરાયો હતો. આ બનાવ અંગે ફાયર ફાયટર ટીમને પણ જાણ કરવામાં આવી હતી.