વઢવાણ બાયપાસ પર રૂ. 1.25 લાખનો દારૂ ભરેલી કાર ઝડપાઈ

- ફરાર શખ્સોને શોધવા તપાસ શરૂ 

- એલસીબીએ કારનો પીછો કરતા કાર ટેન્કર સાથે અથડાઈ હતી : કારચાલક સહિત બે ફરાર 

સુરેન્દ્રનગર : સુરેન્દ્રનગર એલસીબીએ કોઠારીયા નજીક વિદેશી દારૂ ભરેલી કારને અટકાવવાનો પ્રયાસ કરતા કારના ચાલકે કાર ભગાડતા એલસીબી પોલીસ ટીમે પીછો કરી બાયપાસ રોડ પર પહોંચતા દારૂ ભરેલી કાર એક ટેન્કર સાથે અથડાતા કારમાં સવાર બે શખ્સો કાર મુકી નાસી છુટયા હતા. એલસીબી પોલીસે વિદેશી દારૂ, બીયર તેમજ કાર સહીત કુલ રૂા.૪.૨૫ લાખનો મુદ્દામાલ કબજે કરી કાયદેસર કાર્યવાહી હાથ ધરી છે.

સુરેન્દ્રનગર એલસીબી પોલીસ ટીમને બાતમી મળી હતી કે, લખતર તરફથી એક કારમાં વિદેશી દારૂનો જથ્થો ભરી કાર વઢવાણ તરફ આવી રહી છે. આથી એલસીબી પોલીસ ટીમે કોઠારીયા નજીક વોચ ગોઠવી હતી. તે દરમિયાન બાતમીવાળી કાર પસાર થતાં એલસીબીએ અટકાવવાનો પ્રયાસ કરતા કારચાલકે કાર લઇ નાસી છુટવાનો પ્રયત્ન કર્યો હતો.

 આથી એલસીબી ટીમે પીછો કરતા રસ્તા પર ફિલ્મી દ્રશ્યો સર્જાયા હતા. વિદેશી દારૂનો જથ્થો લઇ જતી કાર વઢવાણ-રાજકોટ બાયપાસ રોડ પર રામપાર્ક નજીક એક ટેન્કર સાથે અથડાતા કારમાં સવાર બે શખ્સો કાર મુકી નાસી છુટયા હતા. 

એલસીબી ટીમે કારની તલાશી લેતા કારમાંથી અલગ અલગ બ્રાન્ડની વિદેશી દારૂની બોટલો તેમજ બીયર સહીત કુલ રૂા.૧,૨૫,૩૦૦ની કિંમતનો વિદેશી દારૂ તેમજ કાર સહીત કુલ રૂા.૪,૨૫,૩૦૦નો મુદ્દામાલ કબજે કરી કારના ચાલક સામે વઢવાણ પોલીસ મથકે ગુનો નોંધી નાસી છુટેલા શખ્સોને ઝડપી પાડવા તપાસ હાથ ધરી છે.