સુરેન્દ્રનગરમાં પિતાની પિસ્તોલ લઇ ફોટો પડાવવા ગયેલો શખ્સ પકડાયો

- રિવરફ્રન્ટ રોડ પરથી દેશી બનાવટની પિસ્ટલ કબજે લઇ આર્મ્સ એક્ટ હેઠળ ગુનો નોંધ્યો

સુરેન્દ્રનગર : સુરેન્દ્રનગર શહેરના રિવરફ્રન્ટ રોડ પર પિસ્ટલ સાથે ફોટો શુટ કરવા નિકળેલા શખ્સને સુરેન્દ્રનગર સિટી એ-ડિવિઝન પોલીસ ટીમે ઝડપી લીધો હતો. અને રૃા.૨૦ હજારની કિંમતની પિસ્ટલ કબજે કરી આર્મ્સ એક્ટ હેઠળ ગુનો નોંધી કાયદેસર કાર્યવાહી હાથ ધરી હતી.

સુરેન્દ્રનગર શહેરના રતનપર વિસ્તારમાં રહેતા આરીફભાઇ ઉર્ફે તોતડો સાઉદીનભાઇ જામ ગેરકાયદેસર હથિયાર સાથે રિવરફ્રન્ટ રોડ પરથી ઝડપાયો હતો. પોલીસે ૨૦ હજારની કિંમતની દેશી હાથ બનાવટની પિસ્ટલ કબજે કરી સુરેન્દ્રનગર સિટી એ-ડિવિઝન પોલીસ મથકે આર્મ્સ એક્ટ હેઠળ ગુન્હો નોંધી કાયદેસર કાર્યવાહી હાથ ધરી હતી.

દેશી હાથ બનાવટની પિસ્ટલ સાથે ઝડપાયેલા આરીફ ઉર્ફે તોતડો સાઉદીનભાઇ જામની પોલીસે પુછપરછ કરતા આરીફે પોલીસ સમક્ષ કબુલાત કરતા જણાવ્યું હતું કે આ પિસ્ટલ તેના પિતા પાસે અગાઉ હતી. તેના પિતાનું અંદાજે ૧૪ વર્ષ પહેલા મૃત્યુ નિપજ્યું હતું. આ પિસ્ટલ કબાટમાંથી મળી આવતા આરીફ પિસ્ટલ સાથે ફોટો પડાવવા માટે રિવરફ્રન્ટ રોડ પર ગયો હતો. તે દરમિયાન પોલીસના હાથે ઝડપાઇ ગયો હતો.