સુરેન્દ્રનગર જિલ્લામાં પાંચ સામે જાહેરનામા ભંગની ફરિયાદ

- ચોટીલા અને ધ્રાંગધ્રા હાઈવે તથા જોરાવરનગર, થાનમાં તપાસ હાથ ધરાઈ 

સુરેન્દ્રનગર : સુરેન્દ્રનગર જિલ્લામાં હોટલો, દુકાનોમાં સીસીટીવી ન લગાવનાર ચાર સંચાલકો તથા ભંગારના લે-વેચનું રજિસ્ટર ન રાખનાર એક વેપારી મળી કુલ પાંચ લોકો સામે જાહેરનામા ભંગની ફરિયાદ નોંધાઈ હતી.  

ચોટીલા હાઈવે પર આવેલી ગુરૃકૃપા હોટલમાં સીસીટીવી કેમેરા લગાવેલા ન હોવાથી ચોટીલા પોલીસે હોટલના સંચાલક રવિભાઈ ભલાભાઈ સોલંકી સામે જાહેરનામા ભંગનો ગુનો નોંધ્યો હતો. જ્યારે ધ્રાંગધ્રા-હળવદ હાઈવે પર માધવ ટી સ્ટોલ અને ખેતલા આપા ટી સ્ટોલમાં સીસીટીવી ન લગાવનાર સંચાલકો બળદેવભાઈ મોતીભાઈ બામ્ભા અને રાજુભાઈ દેવશીભાઈ વકાતર સામે સુરેન્દ્રનગર એસઓજીએ ધ્રાંગધ્રા તાલુકા પોલીસ મથકે ગુનો નોંધ્યો હતો. તેમજ જોરાવરનગરમાં સોનીની દુકાનમાં સીસીટીવી ન લગાવનાર ઉમેશ વિજયભાઈ સોની સામે જોરાવરનગર પોલીસે ગુનો નોંધ્યો હતો. ઉપરાંત થાનમાં ભંગારની લે-વેચનું રજિસ્ટર ન નિભાવનાર વેપારી સાવરલાલ વિરૃદ્ધ થાન પોલીસે ગુનો નોંધ્યો હતો.