સુરેન્દ્રનગર ડિવિઝનમાંથી ઝડપાયેલી દારૂની 19568 બોટલ પર બુલડોઝર ફેરવ્યું

- 56.45 લાખનો દારૂ ઝડપાયો હતો

- છ પોલીસ મથકના મુદ્દામાલનો વઢવાણ અને મુળીના ખાટડીમાં નાશ કરાયો 

સુરેન્દ્રનગર : સુરેન્દ્રનગર ડિવિઝનના અલગ-અલગ ૬ જેટલા પોલીસ મથકોની હદમાં ઝડપાયેલા ઈંગ્લીશ દારૂ અને બિયર સહિતના મુદ્દામાલનો કોર્ટના જરૂરી હુકમ બાદ અલગ-અલગ બે જગ્યાએ અધિકારીઓની હાજરીમાં નાશ કરવામાં આવ્યો હતો.

સુરેન્દ્રનગર પોલીસ ડિવીઝન તાબા હેઠળ આવતા એ-ડિવીઝન, બી-ડિવીઝન, જોરાવરનગર, વઢવાણ, લખતર અને મુળી પોલીસ મથકની હદમાં ઝડપાયેલા ઈંગ્લીશ દારૂની બોટલો નંગ-૧૭,૩૫૮ કિંમત રૂા.૫૪.૨૧ લાખ તથા બીયર ટીન નંગ-૨,૨૧૦ કિંમત રૂા.૨.૨૪ લાખ સહિતનો મુદ્દામાલ વઢવાણ તેમજ મુળી તાલુકાના ખાટડી ગામે આવેલા સરકારી ખરાબાની જમીનમાં બુલડોઝર ફેરવી નાશ કરવામાં આવ્યો હતો.

 આ સમગ્ર કામગીરી જિલ્લા પોલીસવડા ડો.ગીરીશકુમાર પંડયાની સુચનાથી ડીવાયએસપી એચ.પી.દોશી તેમજ ચોટીલા મેજીસ્ટ્રેટ પી.એચ.ગળચર સહિતના અધિકારીઓની ઉપસ્થિતિમાં અને કોર્ટ દ્વારા હુકમ સહિતની પ્રક્રિયાઓ પૂર્ણ કર્યા બાદ કરવામાં આવી હતી.