રાયગઢ રાવળીયાવદર રોડ પર બિટ એન્ડ રનમાં બાઇકસવાર યુવાનનું મોત

- અજાણ્યો વાહન ચાલક અકસ્માત સર્જી યુવાનનું મોત નિપજાવી ફરાર

ધ્રાંગધ્રા : ધ્રાંગધ્રાના રાયગઢ રાવળીયાવદર રોડ પર  દૂધ ભરી પરત આવતા યુવાનના બાઇકને અડફેટે લેતા અકસ્માત સર્જી અજાણ્યા વાહનનો ચાલક ફરાર થઇ ગયો હતો. જ્યારે આ અકસ્માતમાં બાઇક ચાલકનું મોત નિપજતાં અજાણ્યા વાહનચાલક સામે ધ્રાંગધ્રા તાલુકા પોલીસ મથકે ફરિયાદ નોંધાઇ છે. 

ધ્રાંગધ્રાના રાયગઢ ગામની સીમમાં રહેતા અનિલભાઇ પ્રભુભાઇ ઘેલાડીયા બાઇક લઇ રાત્રીના સમયે રાયગઢ ગામે દૂધ ભરવા ગયાં હતાં અને ત્યાંથી પરત ફરતા હતા તે દરમિયાન કોઇ અજાણ્યા વાહનના ચાલકે અનિલભાઇના બાઇકને અડફેટે લેતા અકસ્માત સર્જાયો હતો. 

જેમાં અનિલભાઇ બાઇકમાંથી નીચે પટકાતાં ગંભીર ઇજાઓ થતાં મોત નિપજ્યું હતું. જ્યારે અજાણ્યો વાહનચાલક અકસ્માત સર્જી ફરાર થઇ ગયો હતો આ બનાવ અંગે મૃતક અનિલભાઇના પરિવારજનોને જાણ થતાં તાત્કાલિક ઘટનાસ્થળે પહોંચી ગયાં હતાં અને મૃતકની લાશને પોસ્ટમોર્ટમ માટે લઇ જવામાં આવી હતી. 

આ બનાવ અંગે મૃતક અનિલભાઇના ભાઇ મહેશભાઇ પ્રભુભાઇ ઘેલડીયાએ અજાણ્યા વાહનચાલક સામે ધ્રાંગધ્રા તાલુકા પોલીસ મથકે ફરીયાદ નોંધાવતા પોલીસે ગુન્હો નોંધી વધુ તપાસની કામગીરી હાથ ધરી છે.