મહિલાના વેશમાં રેકી કર્યા બાદ અન્ય એક શખ્સ બાઈકની ચોરી કરી

- થાનમાં બાઈક ચોરીના સીસીટીવી ફૂટેજ સામે આવ્યા 

સુરેન્દ્રનગર : થાનમાં થોડા દિવસો પહેલા ઘર પાસે પાર્ક કરેલી બાઈકની ચોરી થઇ હતી. આ ઘટનાના હાલ સીસીટીવી સામે આવ્યા છે. જેમાં એક શખ્સ મહિલાના વેશમાં રેકી કરી અન્ય શખ્સ સાથે આવી ચોરી કરતો નજરે પડયો હતો જેને આધારે પોલીસે વધુ તપાસ હાથધરી છે.

થાન શહેરી વિસ્તારમાં રહેતા કરણસિંહ ઝાલાએ પોતાના ઘર પાસે રાબેતા મુજબ બપોરે બાઈક પાર્ક કરી ઘરે ગયા હતા અને અંદાજે ૩૦ મિનિટ બાદ પરત બહાર આવતા બાઈક નજરે ન પડતા આસપાસ શોધખોળ હાથધરી હતી. 

પરંતુ બાઈકનો કોઈ જ પત્તો લાગ્યો નહોતો. આ ઘટનાના સીસીટીવી હાલ સામે આવ્યા છે જેમાં બે શખ્સો પૈકી એક શખ્સ મહિલાના વેશમાં આવી રેકી કરતો હોવાનું નજરે ચઢે છે. ત્યારબાદ અન્ય એક શખ્સ બાઈકની ચોરી કરતો સીસીટીવીમાં કેદ થયો હતો જેને આધારે પોલીસે વધુ તપાસ હાથધરી છે.