ચોટીલાના લાખણકા નજીક રિક્ષા અને બાઇક વચ્ચે અકસ્માત, એકનું મોત

- અકસ્માતમાં બાઇક સવાર યુવાનને ગંભીર ઇજાઓ થઇ હતી

- સારવાર કારગત ન નિવડતા યુવકનું રાજકોટની હોસ્પિટલમાં મોત નિપજ્યું 

સુરેન્દ્રનગર : ચોટીલા તાલુકાના લાખણકા ગામના જીઇબી સબ સ્ટેશન પાસે રિક્ષા અને બાઇક સામસામે અથડાતા અકસ્માત સર્જાયો હતો. જેમાં બાઇકમાં સવાર યુવાનને ગંભીર ઇજાઓ થતાં સારવાર દરમિયાન મોત નિપજ્યું હતું. આ મામલે ચોટીલા પોલીસ મથકે અકસ્માત અંગેની ફરિયાદ નોંધાતા પોલીસે ગુનો નોંધી કાર્યવાહી હાથ ધરી હતી.

ચોટીલા તાલુકાના ગુંદા ગામે રહેતા વિજય વિનુભાઇ મકવાણા બાઇક લઇ સુરૈઇથી  લાખણકા જઇ રહ્યાં હતાં. તે દરમિયાન લાખણકા ગામ નજીક આવેલા જીઇબી સબસ્ટેશન પાસે પહોંચતા સામેથી પુરપાટ ઝડપે આવતી રિક્ષા બાઇક સાથે અથડાતા અકસ્માત સર્જાયો હતો. જેમાં વિજયભાઇને પગના ભાગે તથા કાનના ભાગે તેમજ માથાના ભાગે ગંભીર ઇજાઓ પહોંચતા સારવાર માટે રાજકોટ સરકારી હોસ્પિટલ ખાતે લઇ જવામાં આવ્યા હતાં. સારવાર કારગત ન નિવડતા યુવાનનું મોત નિપજ્યું હતું. આ અકસ્માતના બનાવ મામલે મૃતકના કૌટુંબિક ભાઇ જયસુખભાઇ મકવાણાએ અકસ્માત સર્જનાર રિક્ષા ચાલક સામે ચોટીલા પોલીસ મથકે ફરિયાદ નોંધાવતા પોલીસે ગુનો નોંધી તપાસ હાથ ધરી છે.