સુરેન્દ્રનગરમાં મકાનમાંથી 57 હજારના દારૂ સાથે શખ્સ ઝડપાયો

- દિલ્લીથી કુરીયરમાં દારૂ મંગાવનાર સહિત ચાર સામે ગુનો નોંધાયો 

સુરેન્દ્રનગર : સુરેન્દ્રનગર એલસીબીએ ૮૦ ફૂટ રોડ પર આવેલા મકાનમાંથી રૂ.૫૭ હજારના વિદેશી દારૂ સાથે એક શખ્સને ઝડપી લીધો હતો. એલસીબીએ બિ-ડિવિઝન મથકે ૪ શખ્સો સામે ગુનો નોંધી કાયદેસર કાર્યવાહી હાથ ધરી છે.

ગતી એક્સપ્રેસ ટ્રાન્સપોર્ટ દ્વારા કુરીયરથી વિદેશી દારૂનો જથ્થો મંગાવવામાં આવ્યો હોવાની તથા ટ્રાન્સપોર્ટમાં કામ કરતા અવેશભાઇ ઇસમભાઇ ખોડ સામેલ હોવાની બાતમી મળતા એલસીબીએ અવેશને સાથે રાખી સુરેન્દ્રનગર ૮૦ફૂટ રોડ પર રહેતા દીનેશભાઇ ધનસુખભાઇ ઝરવરીયાના મકાનમાં દરોડો કર્યો હતો. 

જેમાં વિદેશી દારૂની અલગ અલગ બ્રાન્ડનો રૂ.૫૭ હજારનો જથ્થો મળી આવ્યો હતો. જ્યારે દીનેશ હાજર મળી આવ્યો ન હતો. આ અંગે અવેશની પુછપરછ હાથ ધરતા વિદેશી દારૂનો જથ્થો દિલ્હીના આદમ નામના શખ્સે મોકલ્યો હોવાની તેમજ દીનેશ સાથે અન્ય એક શખ્સ સામેલ હોવાની કબુલાત કરતા કુલ ૪ શખ્સો સામે બી-ડિવિઝન પોલીસ મથકે ગુનો નોંધી બાકીના આરોપીઓને ઝડપી લેવા પોલીસે વધુ તપાસ હાથ ધરી છે.