બોરિયાનેશ પાસેથી ટુવ્હીલરમાં દારૂની ખેપ મારતો શખ્સ ઝડપાયો

- 34 હજારનો મુદ્દામાલ કબજે કરી સનાળાના શખ્સ સામે ગુનો નોંધ્યો 

ચોટીલા, સુરેન્દ્રનગર : નાની મોલડી પોલીસે બોરિયાનેશ ગામ નજીકથી એક્ટિવામાં વિદેશી દારૂની ખેપ મારતા મોરબી જિલ્લાના સનાળા ગામના શખ્સને ઝડપી લીધો હતો. વિદેશી દારૂની ૨૨ બોટલો, એક્ટિવા અને મોબાઇલ મળી કુલ રૂા.૩૪,૦૦૦નો મુદ્દામાલ કબજે કરી કાયદેસર કાર્યવાહી હાથ ધરી છે.

નાની મોલડી પોલીસને પેટ્રોલિંગ દરમિયાન બાતમી મળી હતી કે, હાઇવે પર એક શખ્સ એક્ટિવામાં વિદેશી દારૂનો જથ્થો લઇ પસાર થવાનો છે. જેના આધારે પોલીસે બોરિયાનેશ નજીક આવેલી ચેકપોસ્ટ પાસે વોચ ગોઠવી હતી.

તે દરમિયાન શંકાસ્પદ હાલતમાં એક્ટિવા લઇ પસાર થતાં સનાળા ગામના હરેશભાઇ અરજણભાઇ બોરસણિયાને અટકાવી તલાશી લેતા તેની પાસે રહેલા કાળા થેલામાંથી વિદેશી દારૂની ૨૨ બોટલો કિંમત રૂ.૧૧ હજાર મળી આવી હતી. પોલીસે રૂ.૩૪ હજારનો મુદ્દામાલ કબજે કરી ગુનો નોંધ્યો હતો.

શખ્સ વિરૂદ્ધ અગાઉ મોરબી એ ડીવીઝન પોલીસ મથકે પ્રોહિબીશનના બે ગુનાઓ નોંધાયેલા હોવાનું ખુલ્યું હતું.