લીંબડી રાણપુર રોડ ઉપર ઉંટડીના પુલ પાસે પાલિકાનું ટેન્કર પલટી ગયું

- ટેન્કર રોડ પર 10 ફૂટ ઢસડાયું

- અકસ્માતમાં ટેન્કરના ડ્રાઈવર સહિત ૧૦થી વધુ રાહદારીઓનો આબાધ બચાવ

લીંબડી : લીંબડી રાણપુર રોડ ઉપર ઉંટડીના પુલ પાસે લીંબડી નગરપાલિકાનું પાણીનું ટેન્કર પલટી ખાઈ જતા અકસ્માત સર્જાયો હતો. જો કે, અકસ્માતમાં ટેન્કર ડ્રાઈવર સહિત અન્ય ૧૦થી વધુ રાહદારીઓનો આબાધ બચાવ થયો હતો.

લીંબડી નગરપાલિકાના ટેન્કર ડ્રાઈવર લીંબડી રાણપુર રોડ પર પાણીનું ટેન્કર લઈને લીંબડી નગરપાલિકા તરફ આવી રહ્યા હતા. તે સમયે ઉંટડીના પુલ પાસે પહોંચતાં તેને સ્ટિયરિંગ પરનો કાબૂ ગુમાવતાં પાણીનું ટેન્કર અચાનક પલટી ખાઈને આઠથી દસ ફૂટ ઢસડાયું હતું. અકસ્માત વખતે તેની આગળથી પસાર થતાં છકડો રીક્ષામાં ૧૦થી વધુ ખેત મજૂરો જઈ રહ્યા હતા. તે તમામના જીવ તાળવે ચોંટી ગયા હતા. 

જો કે સદનસીબે કોઈ જાનહાનિ થઈ ન હતી. ટેન્કર ચાલક દારૂના નશામાં ટેન્કર ચલાવી રહ્યો હતો જેના કારણે અકસ્માત સર્જાયો હોવાના છકડો રિક્ષામાં બેઠેલા ખેત મજૂરો અને ત્યાંથી પસાર થતા રાહદારીઓએ આક્ષેપો કર્યા હતા. અકસ્માત બાદ રોડ પર ટ્રાફિક જામ સર્જાયો હતો. બાદમાં ટેન્કરને રોડ પરથી હટાવવાની કાર્યવાહી હાથ ધરી ટ્રાફિક હળવો કરાયો હતો.