પાજવાળીમાંથી 3.76 લાખના લીલા ગાંજા સાથે શખ્સ ઝડપાયો

- ગેરકાયદે લીલા ગાંજાનું વાવેતર ઝડપાયું

- સ્થાનિક પોલીસને અંધારામાં રાખીને એસઓજીનો દરોડો

સુરેન્દ્રનગર : ચોટીલા તાલુકાના ઝરિયા મહાદેવ વિસ્તારમાં આવેલા પાજવાળી ગામની સીમમાંથી એસઓજીએ ગેરકાયદે લીલા ગાંજાનું વાવેતર ઝડપી પાડયું હતું અને લીલા ગાંજાના છોડ સહિતના મુદ્દામાલ સાથે એક શખ્સને ઝડપી લઈ નાર્કોટીક્સ એક્ટ હેઠળ ગુનો નોંધી કાયદેસરની કાર્યવાહી હાથધરી છે.

એસઓજીએ ઝરિયા મહાદેવ નજીક આવેલા પાજવાળી ગામની સીમમાંથી ગેરકાયદેસર લીલા ગાંજાના છોડનું વેચાણ માટે વાવેતર ઝડપી પાડયું હતું. દરોડા દરમિયાન ભાવેશભાઈ જાદવભાઈ રૂદાતલા નામના શખ્સને લીલા ગાંજાના છોડ નંગ-૫ વજન ૩૭.૬૭ કિલો કીંમત રૂા.૩,૭૬,૭૦૦, મોબાઈલ  મળી કુલ રૂા.૩,૮૧,૭૦૦નો મુદ્દામાલ કબ્જે કર્યો હતો.

 તેમજ ઝડપાયેલા શખ્સ વિરૂધ્ધ ચોટીલા પોલીસ મથકે ઝડપાયેલ શખ્સ વિરૂધ્ધ ગુનો નોંધી કાયદેસરની કાર્યવાહી હાથ ધરી છે. જ્યારે સ્થાનીક પોલીસને અંધારામાં રાખી એસઓજી ટીમે રેઈડ કરતા પોલીસની કામગીરી સામે અનેક સવાલો ઉભા થયા છે.