ભારતીય દિગ્ગજોએ પાકિસ્તાનને ધૂળ ચટાડી, વર્લ્ડ ચેમ્પિયનશિપ ઓફ લેજન્ડ્સની પહેલી ટ્રોફી પર કબજો

WCL 2024 Final: ટીમ ઈન્ડિયાના દિગ્ગજ ખેલાડીઓની ટીમે વર્લ્ડ ચેમ્પિયનશિપ ઓફ લિજેન્ડ્સની પ્રથમ સિઝનનું ટાઇટલ જીતીને રેકોર્ડ સર્જી દીધો છે. યુવરાજ સિંહના નેતૃત્વમાં ભારતીય ચેમ્પિયન્સે 13 જુલાઈના રોજ એજબેસ્ટન, બર્મિંગહામ ખાતે રમાયેલી ફાઈનલ મેચમાં પાકિસ્તાન ચેમ્પિયન્સને 5 વિકેટથી હરાવ્યું હતું. પાકિસ્તાનના કેપ્ટન યુનિસ ખાને ટોસ જીતીને પ્રથમ બેટિંગ કરવાનો નિર્ણય કર્યો હતો. પાકિસ્તાનની ટીમે 20 ઓવરમાં 156/6નો સારો સ્કોર બનાવ્યો હતો.

ભારતે 19.1 ઓવરમાં ટારગેટ પ્રાપ્ત કર્યો 

જવાબમાં ભારતે 19.1 ઓવરમાં ટાર્ગેટ હાંસલ કરી લીધો હતો અને 5 વિકેટે આસાન વિજય નોંધાવ્યો હતો. અંબાતી રાયડુએ માત્ર 30 બોલમાં 50 રનની શાનદાર ઇનિંગ રમીને ભારતની જીતમાં મહત્વની ભૂમિકા ભજવી હતી. લક્ષ્યનો પીછો કરતા ભારતે શાનદાર શરૂઆત કરી હતી. ઓપનર રોબિન ઉથપ્પા અને રાયડુએ પાવરપ્લેમાં પાકિસ્તાની બોલરોનો બહાદુરીપૂર્વક સામનો કર્યો હતો. રાયડુએ પહેલી જ ઓવરમાં આમિર યામીનને ચોગ્ગા અને છગ્ગા ફટકારીને ભારતીય ઈનિંગની સારી શરૂઆત કરી હતી.

રાયડુએ બાજી સંભાળી હતી 

ઉથપ્પાએ પણ બીજા છેડેથી પ્રહાર ચાલુ રાખ્યો અને આગામી ઓવરમાં યામીનને બે ચોગ્ગા ફટકાર્યા. જો કે, તે પોતાની ઇનિંગ્સને આગળ વધારવામાં નિષ્ફળ રહ્યો હતો અને તે જ ઓવરમાં આઉટ થયો હતો. સુરેશ રૈના ત્રીજા નંબરે બેટિંગ કરવા આવ્યો હતો અને તેણે ફોર સાથે પોતાનું ખાતું ખોલ્યું હતું. પરંતુ બીજા જ બોલ પર સોહેલ સીધો જ તનવીરના હાથે કેચ થઈ ગયો, જેના કારણે ભારતનો સ્કોર 38/2 થઈ ગયો. બે પ્રારંભિક આંચકો પછી, રાયડુએ એન્કરની ભૂમિકા ભજવવાનું નક્કી કર્યું. તેણે ગુરકીરત સિંહ માન સાથે 60 રનની મહત્વપૂર્ણ ભાગીદારી કરી હતી. રાયડુએ માત્ર 29 બોલમાં તેની અડધી સદી પૂરી કરી, ભારતને 11 ઓવર પછી 98/2ની મજબૂત સ્થિતિમાં પહોંચાડ્યું હતું. 

પાકિસ્તાને ઘણાં કેચ છોડ્યાં 

જ્યારે મેચ ભારતની પકડમાં હોય તેવું લાગતું હતું, ત્યારે પાકિસ્તાને 10 બોલમાં અંબાતી રાયડુ (30 બોલમાં 50) અને ગુરકીરત સિંહ માન (33 બોલમાં 34)ની વિકેટ લઈને વાપસી કરી હતી. પાકિસ્તાને ઇનિંગ્સના અંતે કેટલાક કેચ છોડ્યા હતા જેના કારણે યુસુફ પઠાણ અને યુવરાજ સિંહે 42 રનની મહત્વપૂર્ણ ભાગીદારીમાં જીવતદાન મેળવ્યું હતું. 

મિસ્બાહ રિટાયર્ડ હર્ટ થયો હતો 

આ પહેલા પાકિસ્તાનની શરૂઆત ખરાબ રહી હતી. અનુરીત સિંહે બીજી ઓવરમાં ઓપનર શરજીલ ખાન (10 બોલમાં 12 રન)ને આઉટ કર્યો, જ્યારે માત્ર 14 રન થયા હતા. સોહેબ મકસૂદ પણ સારી શરૂઆતને મોટી ઇનિંગ્સમાં ફેરવવામાં નિષ્ફળ રહ્યો હતો અને 21 (12) રન બનાવીને વિનય કુમારનો શિકાર બન્યો હતો. કામરાન અકમલ 24 રન બનાવીને મોટા સ્કોર તરફ આગળ વધી રહ્યો હતો, પરંતુ નવમી ઓવરમાં પવન નેગીનો શિકાર બન્યો, જેના કારણે પાકિસ્તાનનો સ્કોર 8.2 ઓવર પછી 68/3 થઈ ગયો. એક છેડેથી વિકેટો પડતી રહી અને બીજા છેડે શોએબ મલિકે પોતાની ટીમ માટે એન્કરની ભૂમિકા ભજવી. તેણે સ્કોરબોર્ડને ગતિમાન રાખ્યું. જોકે, મિસબાહ-ઉલ-હક ખેંચાણ આવતા તે રિટાયર્ડ હર્ટ થઈ ગયો હતો. મિસ્બાહ વિના પાકિસ્તાને સંઘર્ષ કર્યો અને 20 ઓવરમાં 6 વિકેટ ગુમાવીને માત્ર 156 રન જ બનાવી શક્યું. 9 બોલમાં 19 રન બનાવનાર સોહેલ તનવીરને કારણે સ્કોરમાં થોડો વધારો થયો હતો.