યશસ્વી જયસ્વાલને કેમ ઈંગ્લેન્ડ સામેની T20 સીરિઝમાં ના રમાડ્યો? ટીમ મેનેજમેન્ટનો શું છે પ્લાન
Updated: Jan 12th, 2025
IND Vs ENG, Yashasvi Jaiswal : ભારતીય ક્રિકેટ ટીમ આગામી સમયમાં 22 જાન્યુઆરીથી ઇંગ્લેન્ડ સામે 5 મેચની T20 સીરિઝ રમવાની છે. જેના માટે BCCIએ ટીમની જાહેરાત કરી દીધી છે. બોર્ડે ઇંગ્લેન્ડ સામેની T20 સીરિઝ માટે કુલ 15 ખેલાડીઓનો નામની જાહેરાત કરી છે. આ સીરિઝ માટે ટીમના કેપ્ટન તરીકે સૂર્યકુમાર યાદવની પસંદગી કરવામાં આવી છે. પરંતુ આ ટીમમાં T20 ફોર્મેટનો મહત્ત્વપૂર્ણ ભાગ રહેલા કેટલાક ખેલાડીઓનો ટીમમાં સમાવેશ કરવામાં આવ્યો નથી. આમાંથી એક નામ યશસ્વી જયસ્વાલનું પણ છે. જયસ્વાલે છેલ્લે શ્રીલંકા પ્રવાસ પર T20 સીરિઝ રમી હતી. ઇંગ્લેન્ડ સામેની T20 સીરિઝમાં જયસ્વાલને પસંદ ન કરવાનું કારણ શું હોઈ શકે ચાલો તેને સમજીએ....
કેમ યશસ્વી જયસ્વાલને ટીમમાં સામેલ ન કરાયો?
યશસ્વી જયસ્વાલને પસંદ ન કરવાનું મુખ્ય કારણ તેના પર વધારોના વર્કલોડને લઈને હોઈ શકે છે. હકીકતમાં, ઇંગ્લેન્ડ સામેની 5 મેચની T20 સીરિઝ પછી ભારતે ત્રણ મેચની વનડે સીરિઝ અને પછી ICC ચેમ્પિયન્સ ટ્રોફી રમવાની છે. કહેવાઈ રહ્યું છે કે, યશસ્વી જયસ્વાલની વનડે ટીમમાં પસંદગી કરવામાં આવી શકે છે. જો કે, ત્યાં પણ તે બેકઅપ ઓપનર હશે કારણ કે શુભમન ગિલ રોહિત શર્મા સાથે વનડેમાં સારું પ્રદર્શન કરી રહ્યો છે. જો કે, તાજેતરમાં ગિલનું ફોર્મ બહુ સારું રહ્યું નથી. પરંતુ જો આગામી મેચોમાં ગિલનું પ્રદર્શન સારું નહી રહે તો તેની જગ્યાએ યશસ્વી જયસ્વાલને તક મળી શકે છે.
આ ખેલાડીઓ કરશે ઇંગ્લેન્ડ સામે ઓપનિંગ
સંજુ સેમસન અને અભિષેક શર્મા ઈંગ્લેન્ડ સામેની T20 સીરિઝમાં ભારતીય ઇનિંગ્સની શરૂઆત કરતા જોવા મળી શકે છે. સેમસને દક્ષિણ આફ્રિકા પ્રવાસ પર બે સદી ફટકારીને શાનદાર પ્રદર્શન કર્યું હતું. જો કે, અભિષેકના પ્રદર્શનમાં ખામી રહી ગઈ હતી. હવે અભિષેકે આ 5 T20 મેચોમાં પ્રદર્શન કરવું પડશે, નહીં તો તેનું સ્થાન પણ જોખમમાં મુકાઈ શકે છે.
ઈંગ્લેન્ડ સામેની T20 સીરિઝ માટેની ભારતીય ટીમ : સૂર્યકુમાર યાદવ (કેપ્ટન), સંજુ સેમસન (વિકેટકીપર), અભિષેક શર્મા, તિલક વર્મા, હાર્દિક પંડ્યા, રિંકુ સિંહ, નીતિશ કુમાર રેડ્ડી, અક્ષર પટેલ (વાઈસ-કેપ્ટન), હર્ષિત રાણા, અર્શદીપ સિંહ, મોહમ્મદ શમી, વરુણ ચક્રવર્તી, રવિ બિશ્નોઈ , વોશિંગ્ટન સુંદર, ધ્રુવ જુરેલ (વિકેટકીપર).
