શા માટે MS ધોની 7 નંબરની જર્સી પહેરીને મેદાનમાં ઉતરે છે? જાણો સાચી હકીકત

                                                        Image Source: Facebook

નવી દિલ્હી, તા. 17 જૂન 2023 શનિવાર

દિગ્ગજ ક્રિકેટર મહેન્દ્ર સિંહ ધોનીએ તાજેતરમાં જ ચેન્નઈ સુપરકિંગ્સને રેકોર્ડ 5 મી વખત IPL ચેમ્પિયન બનાવી છે. આઈસીસીની ત્રણેય મોટી ટુર્નામેન્ટ જીતનાર વિશ્વના એકમાત્ર કેપ્ટન ધોની સોશિયલ મીડિયા પર વધુ એક્ટિવ રહેતા નથી. તેઓ ખૂબ ઓછુ બોલવામાં માને છે. જોકે ક્યારેક ધોની કંઈક એવુ કહી જાય છે જેના વિશે લોકો જાણવા ઈચ્છુક રહે છે. ધોનીને 7 નંબર પ્રત્યે ખૂબ લગાવ છે. શું ધોની અંધવિશ્વાસુ છે?, જે 7 નંબરની જર્સી પહેરીને મેદાનમાં ઉતરે છે, આવો જાણીએ આના પાછળની હકીકત.

ટીમ ઈન્ડિયાના પૂર્વ કેપ્ટન મહેન્દ્ર સિંહ ધોની જ્યારે દેશ માટે રમતા હતા ત્યારે તેઓ 7 નંબરની જર્સી પહેરીને મેદાનમાં ઉતરતા હતા. માહી હવે ઈન્ટરનેશનલ ક્રિકેટને અલવિદા કહી ચૂક્યા છે પરંતુ તેઓ હજુ આઈપીએલમાં રમી રહ્યા છે. આ પ્રતિષ્ઠિત ટી20 લીગમાં પણ ધોનીની જર્સીની પાછળ 7 નંબર લખેલુ હોય છે.

મહેન્દ્ર સિંહ ધોનીનો જન્મ 7 જુલાઈ 1981એ થયો હતો એટલે કે 7 તારીખ અને 7 મો મહિનો. ધોની પોતાના બર્થડેના કારણે 7 નંબરની જર્સી પહેરે છે. આ જર્સી ધોની માટે લકી સાબિત થઈ છે. તેમણે આ નંબરની જર્સી પહેરીને ભારતને 2008 માં ટી20 વર્લ્ડ કપ ચેમ્પિયન બનાવ્યુ જ્યારે 2011માં માહીની અધ્યક્ષતામાં ટીમ ઈન્ડિયા વનડે વર્લ્ડ કપ જીતવામાં સફળ રહી. જે બાદ ધોનીની કેપ્ટનશિપમાં ભારતીય ટીમે 2013માં આઈસીસી ટ્રોફી પોતાના નામે કરી. 

મહેન્દ્ર સિંહ ધોનીએ આઈપીએલ દરમિયાન એક વખત જણાવ્યુ હતુ કે સાત એવી સંખ્યા છે, જે તમારા પક્ષમાં ન આવે તો તમારા વિરુદ્ધ પણ જતી નથી. માહીનું કહેવુ હતુ પોતાની જર્સીના નંબરની પસંદગી કર્યા પહેલા તેમણે કોઈ વસ્તુ વિશે જાણવુ યોગ્ય લાગ્યુ નહીં. મહેન્દ્ર સિંહ ધોનીએ 23 ડિસેમ્બર 2004માં ઈન્ટરનેશનલ ક્રિકેટમાં પગ મૂક્યો હતો. ત્યારે ટીમ ઈન્ડિયાના કેપ્ટન સૌરવ ગાંગુલી હતા. ગાંગુલીએ ધોનીને તેમની ડેબ્યૂ મેચમાં નંબર 7 પર બેટિંગ માટે મોકલ્યા પરંતુ માહી ખાતુ ખોલી શક્યા નહીં. જોકે કયા ખેલાડીને કયા ક્રમ પર મોકલવા અને કોનો શું રોલ રહેશે, તેની પર નિર્ણય ટીમ મેનેજમેન્ટ લે છે. ડેબ્યૂ મેચમાં શૂન્યના સ્કોર પર પવેલિયન ફરનારા માહીનો આત્મવિશ્વાસ ડગ્યો નહીં પરંતુ વધુ મજબૂત થયો અને તે બાદથી તેઓ સફળતાની સીડીઓ ચઢતા ગયા. માહી ભારતીય ક્રિકેટના સૌથી સફળ કેપ્ટન છે. તેમણે ભારતને 2 વર્લ્ડ કપ જીતાડ્યા છે.

42 વર્ષીય માહીની ફેન ફોલોઈંગ સમગ્ર દુનિયામાં છે. એવી અટકળો લગાવાઈ રહી હતી કે આઈપીએલ 2023 ધોની માટે અંતિમ આઈપીએલ હશે પરંતુ માહીએ આ મુદ્દે પૂર્ણ વિરામ લગાવી દીધુ છે. ધોની આગામી વર્ષે પણ આ લીગમાં રમતા જોવા મળશે. તેમણે આઈપીએલથી સંન્યાસની જાહેરાત કરી નથી. તેમનુ કહેવુ છે કે હજુ આઈપીએલના 17માં એડિશનના આયોજનમાં ખૂબ સમય છે, તેથી આ વિષય પર તેઓ અત્યારે કંઈ કહેશે નહીં.