Video: ન્યૂઝીલેન્ડ સામે ખરાબ પ્રદર્શન બાદ ગુસ્સામાં કોહલીએ બેટ પછાડ્યું, આગની જેમ વીડિયો વાઇરલ

Virat Kohli Viral Video : ભારતીય ટીમનો સ્ટાર બેટર વિરાટ કોહલી ન્યૂઝીલેન્ડ સામેની પુણે ટેસ્ટ મેચમાં ખાસ કમાલ બતાવી શક્યો નહોતો. ખરાબ ફોર્મ સામે ઝઝૂમી રહેલો વિરાટ કોહલી આ મેચની બંને ઇનિંગમાં ખૂબ ઓછા રન બનાવી આઉટ થઇ ગયો હતો. તેના અને ટીમના ખરાબ પ્રદર્શનના કારણે ભારતે ન્યૂઝીલેન્ડ સામેની સીરિઝ 2-0થી ગુમાવી દીધી છે. ભારતીય ટીમે 12 વર્ષ બાદ ઘરઆંગણે કોઇ ટેસ્ટ સીરિઝ ગુમાવી છે. આ દરમિયાન વિરાટ કોહલીનો એક વીડિયો સોશિયલ મીડિયામાં ખૂબ વાઇરલ થઇ રહ્યો છે. જેમાં તે આઉટ થયા બાદ પોતાનો ગુસ્સો નીકાળતો જોવા મળે છે. 

કોહલીનો વીડિયો વાઇરલ થયો

પુણે ટેસ્ટ મેચમાં વિરાટ કોહલીનો બેટ કોઇ ચમત્કાર કરી શક્યો નહોતો તે બંને ઇનિંગમાં કુલ 18 રન જ બનાવી શક્યો હતો. પહેલી ઇનિંગમાં તેણે માત્ર એક જ રન બનાવ્યો હતો, જ્યારે બીજી ઇનિંગમાં તે 17 રન બનાવીને આઉટ થયો હતો. હવે કોહલીનો એક વીડિયો સોશિયલ મીડિયામાં પૂર ઝડપે વાઇરલ થઇ રહ્યો છે. હકિકતમાં, વાઇરલ વીડિયોમાં આઉટ થયા બાદ વિરાટ કોહલી ગુસ્સે ભરાયેલો અને ડ્રેસિંગ રૂમમાં પરત ફરતી વખતે તે એક વોટર બોક્સ પર તાકાતથી બેટ મારતો દેખાય છે. તેનો આ વીડિયો જોઇ તેના ચાહકો પણ ચોંકી ઉઠ્યા છે અને અનેક યુઝર્સ આ વીડિયો પર જાતભાતના કોમેન્ટ્સ પણ કરી રહ્યા છે. 

રોહિત શર્માની કેપ્ટનશીપ પર સવાલ 

ન્યૂઝીલેન્ડ સામે હાર બાદ રોહિત શર્માની કેપ્ટનશીપ પર અનેક સવાલો ઉઠી રહ્યા છે. હકિકતમાં, રોહિત શર્માની એક આક્રમક કેપ્ટન તરીકે જાણીતો હતો. પરંતુ પૂણે ટેસ્ટ મેચ દરમિયાન તે ડિફેન્સીવ કેપ્ટન તરીકે જોવામાં આવ્યો હતો. જ્યારે પહેલી ઇનિંગમાં ન્યૂઝીલેન્ડની ટીમ બે વિકેટ ગુમાવ્યા બાદ સંઘર્ષ કરી રહી હતી. ત્યારે પણ રોહિત શર્માએ આક્રમક ફિલ્ડિંગ ગોઠવી ન હતી. જેનો ન્યૂઝીલેન્ડના બેટરોએ ફાયદો ઉઠાવ્યો હતો. આ જ કારણસર ભૂતપૂર્વ ક્રિકેટર સુનીલ ગાવસ્કરે પણ રોહિત શર્માની કેપ્ટનશીપ પર સવાલ ઉઠાવ્યા હતા. બીજી ઈનિંગમાં પણ રોહિત શર્મા આક્રમણ રમત રમવાનું ટાળતો જોવા મળ્યો હતો.