IND vs BAN: કોહલીએ માત્ર 17 ફટકાર્યા પણ સચિન તેંડુલકરનો મોટો રેકૉર્ડ તૂટ્યો, દિગ્ગજોને પછાડ્યા

Virat Kohli : ભારતીય ક્રિકેટ ટીમના સ્ટાર બેટર વિરાટ કોહલીએ લાંબા વિરામ બાદ ટેસ્ટ ક્રિકેટમાં વાપસી કરી છે. ચેન્નાઈના ચેપોક સ્ટેડિયમમાં રમાઈ રહેલી બાંગ્લાદેશ સામેની પહેલી ટેસ્ટ મેચમાં તે કંઈ ખાસ કરી શક્યો ન હતો. તેણે મેચની પહેલી ઇનિંગમાં માત્ર 6 રન અને જ્યારે બીજી ઇનિંગમાં 17 રન કરી આઉટ થઇ ગયો હતો. આ મેચમાં ભલે કોહલી માત્ર 23 રન જ બનાવી શક્યો હોય, પરંતુ તેણે આંતરરાષ્ટ્રીય ક્રિકેટમાં એક મોટો રેકોર્ડ તોડી નાખ્યો છે, જે સચિન તેંડુલકરના નામે હતો. કોહલી હવે આંતરરાષ્ટ્રીય ક્રિકેટમાં ઘરઆંગણે સૌથી ઓછી ઇનિંગ્સમાં 12000 રનનો આંકડો પાર કરનાર ખેલાડી બની ગયો છે.

સચિન તેંડુલકરનો રેકોર્ડ તોડ્યો 

આ ટેસ્ટ મેચની બીજી ઈનિંગ દરમિયાન વિરાટ કોહલીએ પોતાનો 5મો રન પૂરો કરતાની સાથે જ તે આંતરરાષ્ટ્રીય ક્રિકેટમાં ઘરઆંગણે સૌથી ઓછી ઇનિંગ્સમાં 12000 રન પૂરા કરનાર ખેલાડી બની ગયો હતો. કોહલીએ 243 ઇનિંગ્સ રમી આ સિદ્ધિ મેળવી હતી. અગાઉ આ રેકોર્ડ સચિન તેંડુલકરના નામે હતો, કે જેણે ઘરઆંગણે 267 ઇનિંગ્સમાં પોતાના 12000 આંતરરાષ્ટ્રીય રન પૂરા કર્યા હતા. જો કે ઘરઆંગણે ભારત માટે આંતરરાષ્ટ્રીય ક્રિકેટમાં સૌથી વધુ રન કરવાના મામલે કોહલી હજી સચિન તેંડુલકરથી પાછળ છે, કારણ કે સચિને 14192 રન બનાવ્યા છે, જ્યારે કોહલીએ અત્યાર સુધીમાં 12012 રન બનાવ્યા છે.

આ પણ વાંચોઃ VIDEO: 'ઓય! બધા સૂઈ ગયા કે શું..!', ટીમ પર કેમ ગુસ્સે ભરાયો રોહિત શર્મા? વીડિયો વાઇરલ

આ મામલે કોહલી પાંચમાં સ્થાને

આંતરરાષ્ટ્રીય ક્રિકેટમાં ઘરઆંગણે સૌથી વધુ રન કરવાના મામલે વિરાટ કોહલી હાલમાં પાંચમાં સ્થાને છે, જેમાં સચિન તેંડુલકર ટોચના સ્થાને પર છે. રિકી પોન્ટિંગ 13117 રન સાથે બીજા સ્થાને છે, દક્ષિણ આફ્રિકાનો જેક્સ કાલિસ ત્રીજા સ્થાને છે. જયારે શ્રીલંકન ટીમનો પૂર્વ કેપ્ટન કુમાર સંગાકારા 12043 રન સાથે ચોથા સ્થાન પર છે.

આંતરરાષ્ટ્રીય ક્રિકેટમાં ઘરઆંગણે સૌથી ઓછી ઇનિંગ્સમાં 12000 રન પૂરા કરનારા ખેલાડીઓ

વિરાટ કોહલી - 243 ઇનિંગ્સ

સચિન તેંડુલકર – 267 ઇનિંગ્સ

કુમાર સંગાકારા - 269 ઇનિંગ્સ

જેક કાલિસ – 271 ઇનિંગ્સ

રિકી પોન્ટિંગ - 275 ઇનિંગ્સ