VIDEO: બુમરાહના બૂટમાંથી શું નિકળ્યું? જેના કારણે શરૂ થયો વિવાદ, આર.અશ્વિને પણ કરી સ્પષ્ટતા
Updated: Jan 5th, 2025
Jasprit Bumrah's boot controversy : હાલમાં ભારત અને ઓસ્ટ્રેલિયા વચ્ચે સિડનીમાં રમાયેલી પાંચમી ટેસ્ટ મેચ દરમિયાન ઓસ્ટ્રેલિયન ચાહકો જસપ્રીત બુમરાહ સામે ગેરવર્તન કરતા જોવા મળ્યા હતા. ઓસ્ટ્રેલિયાના ચાહકોએ સિડની ટેસ્ટના બીજા દિવસે બુમરાહ પર બોલ ટેમ્પરિંગનો આરોપ લગાવ્યો હતો. સોશિયલ મીડિયા પર એક વીડિયો શેર કરીને બુમરાહ પર આરોપ લગાવવામાં આવી રહ્યો છે કે બુમરાહના બૂટમાંથી સેન્ડપેપર નીકળ્યું હતું. આ અંગે સ્પષ્ટતા આપતા આર. અશ્વિને કહ્યું હતું કે, આ એક 'ફિંગર પ્રોટેક્શન પેડ' છે. ચાલો જાણીએ કે ફિંગર પ્રોટેક્શન પેડ શું છે? અને તેનો ઉપયોગ ક્યારે અને શા માટે થાય છે.
શું હતી સમગ્ર ઘટના?
હકીકતમાં સિડની ટેસ્ટના બીજા દિવસનો એક વીડિયો સોશિયલ મીડિયા પર વાઈરલ થઈ રહ્યો છે. આ વીડિયોમાં બુમરાહ તેના બૂટને ખોલે છે ત્યારે તેના બૂટમાંથી એક નાની સફેદ રંગની વસ્તુ નીચે પડી જાય છે. પછી તે તેને ઉપાડેને ફરીથી બૂટમાં મૂકી દે છે. ઓસ્ટ્રેલિયન ચાહકો આ સફેદ રંગની વસ્તુને સેન્ડપેપર કહી રહ્યા છે અને તેના પર બોલ ટેમ્પરિંગનો આરોપ લગાવી રહ્યા છે. અહીં તમને જણાવી દઈએ કે ક્રિકેટમાં બોલ ટેમ્પરિંગ એક મોટો ગુનો છે. આવા મામલામાં ઓસ્ટ્રેલિયાના ખેલાડીઓ સ્ટીવ સ્મિથ અને ડેવિડ વોર્નર સામે કડક કાર્યવાહી કરવામાં આવી હતી. દોષિત ઠર્યા બાદ બંને પર એક વર્ષ માટે ક્રિકેટ રમવા પર પ્રતિબંધ લગાવી દેવામાં આવ્યો હતો.
આર. અશ્વિને શું કહ્યું?
ભારતીય બોલર જસપ્રીત બુમરાહ પર લગાવવામાં આવેલા બોલ ટેમ્પરિંગના આરોપનું ખંડન કરતાં ભૂતપૂર્વ ભારતીય ખેલાડી આર. અશ્વિને કહ્યું હતું કે, 'બુમરાહના જૂતામાંથી જે નાની સફેદ વસ્તુ પડી ગઈ હતીતે ફિંગર પ્રોટેક્શન પેડ છે. હવે ચાલો સમજીએ કે આ ફિંગર પ્રોટેક્શન પેડ છેલ્લું છે શું? અને તેનો ઉપયોગ ક્યારે અને ક્યાં કરવામાં આવે છે.'
કઈ રીતે કામ કરે છે ફિંગર પ્રોટેક્શન પેડ?
ફિંગર પ્રોટેક્શન પેડ અથવા ફિંગર પ્રોટેક્શન ટેપનો ઉપયોગ સામાન્ય રીતે રમતગમતમાં થાય છે. ખાસ કરીને તેનો ઉપયોગ બોલિંગ, બેટિંગ એ ફિલ્ડીંગ કરતી વખતે ઈજા થવાનું જોખમ હોય ત્યારે ખેલાડીઓ કરે છે. આ પેડ ખેલાડીઓને તેમની આંગળીઓમાં ઇજાઓથી બચાવવા માટે બનાવવામાં આવે છે. તેનો ઉપયોગ કરીને ખેલાડીને વધારાનું કુશનીંગ આપે છે. જે લાંબા સમય સુધી રમતી વખતે ખેલાડીઓને આરામ આપે છે. ક્રિકેટ જેવી રમતમાં તેનો ઉપયોગ આંગળીઓ અથવા પગને ઝડપી બોલથી થતી ઈજાઓથી બચાવવા માટે થાય છે. તેની સાઈઝ 2 ઈંચ લાંબી અને 1 ઈંચ ગોળ હોઈ શકે છે. તેને ટો કુશન પણ કહેવામાં આવે છે. આ પેડ પ્રીમિયમ સિલિકોન જેલથી બનેલું છે. તે ખૂબ જ નરમ અને આરામદાયક હોય છે.
બોલ ટેમ્પરિંગમાં વપરાતું સેન્ડપેપર શું છે?
હકીકતમાં બોલ ટેમ્પરિંગમાં વપરાતું સેન્ડપેપર એક પ્રકારનું રફ કાગળ હોય છે. તે સિલિકોન કાર્બાઇડ અને એલ્યુમિનિયમ ઓક્સાઇડના રફ કણોથી બનેલું છે. તેનો મુખ્યત્વે ઉપયોગ કોઈ પણ સપાટીને ઘસવા માટે થાય છે. જો આ સેન્ડપેપરને બોલ પર ઘસવામાં આવે છે, તો તે બોલની સપાટીને બદલી જાય છે. જો બોલનો એક ભાગ રફ થઇ જાય તો બોલ વધુ સ્વિંગ કે સ્પિન થાય છે. બોલનો બીજો ભાગ સ્મૂથ હશે તો તેની ઝડપ પર અસર થઈ શકે છે.
