VIDEO : 4,6,4,6,6,4... વિન્ડિઝના શેફર્ડ રોમારિયોને બહુ ‘માર્યો’ એક ઓવરમાં 30 રન ઝૂડી કાઢ્યાં

T20 World Cup 2024: T20 વર્લ્ડ કપ 2024માં રેકોર્ડનો ધમધમાટ છે. હવે ટૂર્નામેન્ટનો સુપર-8 તબક્કો શરૂ થઈ ગયો છે. સુપર-8ની બીજી મેચ  ઈંગ્લેન્ડ અને યજમાન વેસ્ટ ઈન્ડિઝ વચ્ચે રમાઈ હતી. આ મેચમાં યજમાન ટીમને 8 વિકેટે કારમી હારનો સામનો કરવો પડ્યો હતો. ઈંગ્લેન્ડની ટીમે 181 રનનો ટાર્ગેટ માત્ર 17.3 ઓવરમાં મેળવી લીધો હતો. આ મેચમાં વેસ્ટ ઈન્ડિઝનો બોલર રોમારિયો શેફર્ડ (Romario Shepherd) ખરાબ રીતે પરાસ્ત થયો છે. તે T20 ક્રિકેટના ઈતિહાસમાં સૌથી મોંઘી ઓવર ફેંકનાર વિશ્વનો છઠ્ઠો બોલર બની ગયો છે.

30 રન કેવી રીતે મેળવ્યા?

ઈંગ્લેન્ડને 30 બોલમાં 40 રનની જરૂર હતી. સ્ટ્રાઈક પર ઈંગ્લેન્ડનો બેટ્સમેન ફિલિપ સાલ્ટ (Phil Salt)હતો, જે 37 બોલમાં 49 રન બનાવીને રમી રહ્યો હતો. સાલ્ટે શેફર્ડના પ્રથમ બોલ પર ચોગ્ગો ફટકારીને તેની અડધી સદી પૂરી કરી હતી. સાલ્ટે ઓવરના બીજા બોલ પર સિક્સર ફટકારી હતી. તેના આગલા બોલ પર સાલ્ટે ફરીથી બાઉન્ડ્રી ફટકારી. ઓવરના ચોથા બોલ પર, સાલ્ટે લોંગ ઓફ પર સિક્સર ફટકારી અને પછીના બોલ પર તેણે સ્ક્વાયર લેગ પર પુલ શોટ રમીને સિક્સર ફટકારી હતી. ઓવરના 5 બોલમાં 26 રન બની ગયા હતા. ઓવરના છેલ્લા બોલ પર, સાલ્ટે પણ મિડ-ઓફ પર ફુલ ટોસ બોલ પર ફોર ફટકારી અને આખી ઓવરમાં કુલ 30 રન બનાવ્યા.

T20 વર્લ્ડ કપની સૌથી મોંઘી ઓવર

T20 વર્લ્ડ કપના ઈતિહાસમાં સૌથી મોંઘી ઓવર ઈંગ્લેન્ડના બોલર સ્ટુઅર્ટ બ્રોડના નામે છે. તેણે 2007 વર્લ્ડ કપમાં ભારતીય બેટ્સમેન યુવરાજ સિંહ દ્વારા 6 સિક્સર ફટકારી હતી. આ ઓવરમાં યુવરાજ સિંહે 36 રન બનાવ્યા હતા. વર્તમાન વર્લ્ડ કપમાં આ રેકોર્ડની બરોબરી અફઘાનિસ્તાનના બોલર અઝમતુલ્લા ઉમરઝાઈએ કરી હતી. અઝમતુલ્લા ઉમરઝાઈએ વેસ્ટ ઈન્ડિઝ સામે વર્તમાન વર્લ્ડ કપમાં 1 ઓવરમાં 36 રન આપ્યા હતા. વેસ્ટ ઈન્ડિઝનો બોલર રોમારિયો શેફર્ડ T20 વર્લ્ડ કપના ઈતિહાસમાં સૌથી મોંઘી ઓવર ફેંકનાર છઠ્ઠો બોલર છે.