ઝિમ્બાબ્વેના ખેલાડીએ રચ્યો ઈતિહાસ, ગેલ-મેક્કુલમનો રેકોર્ડ તોડનારો વિશ્વનો પહેલો બેટ્સમેન

Sikandar Raza Hits Most Consecutive Half Centuries In T20I : ઝિમ્બાબ્વે ક્રિકેટ ટીમના કેપ્ટન સિકંદર રઝાએ શ્રીલંકા સામે રમાયેલી પ્રથમ T20I મેચમાં ફિફ્ટી ફટકારીને ઈતિહાસ રચી દીધો છે. તેણે T20I ક્રિકેટમાં સતત 5 ઇનિંગ્સમાં 5 ફિફ્ટી ફટકારી હતી. તે આ ફોર્મેટમાં સતત 5 ફિફ્ટી ફટકારનાર દુનિયાનો પહેલો બેટ્સમેન બની ગયો છે. આ પહેલા આ રેકોર્ડ વેસ્ટ ઇન્ડિઝના વિસ્ફોટક બેટ્સમેન ક્રિસ ગેલ અને ન્યુઝીલેન્ડના ખેલાડી બ્રેન્ડન મેક્કુલમના નામે હતો. આ બંને ખેલાડીઓએ તેમનાં કરિયરમાં સતત 4 ફિફ્ટી ફટકારી હતી. તે સિવાય સાઉથ આફ્રિકાના રીઝા હેન્ડ્રીક્સના નામે પણ સતત 4 ફિફ્ટી ફટકારવાનો રેકોર્ડ છે.

બેટિંગની સાથે સાથે બોલિંગમાં કમાલ કરી

છેલ્લી પાંચ T20I મેચોમાં સિકંદર રઝાએ બેટિંગની સાથે સાથે બોલિંગમાં પણ શાનદાર પ્રદર્શન કર્યું છે, તેણે આ તમામ 5 મેચોમાં ઓછામાં ઓછી 2 વિકેટ ઝડપી છે. રવાન્ડા સામે 27 નવેમ્બરના રોજ રમાયેલી મેચમાં રઝાએ 58 રનની શાનદાર ઇનિંગ રમવાની સાથે સાથે 3 રન આપીને 3 વિકેટ પણ ઝડપી હતી. ત્યારબાદ 29 નવેમ્બરના રોજ નાઈજીરિયા સામે 65 રનની ઇનિંગ રમી હતી અને બોલિંગ દરમિયાન તેણે 13 રન આપીને 2 વિકેટ પણ પોતાના નામે કરી હતી. કેન્યા સામે તેણે શાનદાર 82 રન બનાવ્યા હતા. આ સાથે તેણે 21 રન આપીને 2 વિકેટ પણ ઝડપી હતી.

આયરલેન્ડ સામે વર્ષ 2023ની છેલ્લી ફિફ્ટી ફટકારી

રઝાએ 7 ડિસેમ્બરે આયરલેન્ડ સામે વર્ષ 2023માં તેની છેલ્લી ફિફ્ટી ફટકારી હતી. આ દરમિયાન તેણે 65 રન બનાવવા ઉપરાંત 3 વિકેટ પણ લીધી હતી. હવે ગઈકાલે શ્રીલંકા સામે રઝાએ તેની સતત પાંચમી ફિફ્ટી ફટકારી અને 62 રનની ઇનિંગ રમી, આ દરમિયાન તેણે 3 વિકેટ પણ ઝડપી હતી.