એક વર્ષ પહેલાં ગિલે નક્કી કર્યા હતા લક્ષ્યો, તસવીર શેર કરી જણાવ્યું કે કેટલી નજીક પહોંચ્યો

Shubman Gill Shared Picture Of Achieved Goals Of Last Year : શુભમન ગિલ હાલ ભારતીય ક્રિકેટ ટીમ સાથે સાઉથ આફ્રિકાના પ્રવાસે છે. તેણે વનડે અને T20 ક્રિકેટમાં સારું પ્રદર્શન કર્યું છે. પરંતુ ટેસ્ટ ફોર્મેટમાં તે કંઈ ખાસ કરી શક્યો નથી. જેના કારણે તેને ટીકાઓનો પણ સામનો કરવો પડ્યો હતો. પરંતુ ગિલે હાલમાં જ તેના સોશ્યલ મીડિયા એકાઉન્ટ પર એક પ્રેરણાદાયી પોસ્ટ શેર કરી છે. જેમાં તેણે જણાવ્યું કે ગયા વર્ષે તેણે પોતાના માટે કયા લક્ષ્યો નક્કી કર્યા હતા. શુભમને આ લક્ષ્યોને ઘણી હદ સુધી હાંસલ પણ કર્યા છે.

ગિલે ઈન્સ્ટાગ્રામ પર હાથથી લખેલા કાગળની તસવીર કરી શેર

ભારતીય ટીમના સ્ટાર ખેલાડી શુભમન ગિલે ઈન્સ્ટાગ્રામ પર કેટલીક તસવીરો શેર કરી છે. જેમાં એક તસવીર હાથથી લખેલા કાગળની છે. ગિલે આ કાગળ પર આવનારા વર્ષ માટે કેટલાંક લક્ષ્યો લખ્યા હતા. તેણે 31 ડિસેમ્બર 2022ના રોજ આ લક્ષ્યો નક્કી કર્યા હતા. તેના આ લક્ષ્યોમાંનો એક ભારત માટે સૌથી વધુ સદી ફટકારવાનો હતો. વર્લ્ડકપ અને પરિવારને લઈને પણ તેણે લક્ષ્ય નક્કી કર્યું હતું. ગિલે ભારત માટે વર્ષ 2023માં સૌથી વધુ રન બનાવ્યા હતા. તેણે ઘણી હદ સુધી આ લક્ષ્ય હાંસલ પણ કરી લીધા છે.

આ વર્ષ નવા અનુભવો અને આનંદથી ભરેલું હતું

ગિલે તસવીરો શેર કરતા કેપ્શનમાં લખ્યું, ‘એક વર્ષ પહેલાં મેં કંઈક નક્કી કર્યું હતું. 2023 સમાપ્ત થવાનું છે. આ વર્ષ નવા અનુભવો અને આનંદથી ભરેલું હતું. ઘણું શીખવાનું પણ મળ્યું. યોજના પ્રમાણે વર્ષ પૂરું થયું નહીં. પરંતુ હું ગર્વથી કહી શકું છું કે અમે તેની ખૂબ નજીક રહ્યા. આવનારું વર્ષ નવી તકો અને પડકારો લઈને આવશે. મને આશા છે કે અમે 2024માં અમારા લક્ષ્યની નજીક પહોંચીશું.’