ક્રિકેટર શાર્દુક ઠાકુર-મિતાલીના લગ્ન, વરરાજાનો કન્યા સાથેનો અને જાનૈયાઓની એન્ટ્રીનો વીડિયો વાયરલ
મુંબઈમાં આયોજિત એક સમારોહમાં બંનેએ લગ્ન કર્યા
સમારોહમાં રોહિત શર્મા, અય્યર સહિત ઘણા ક્રિકટરો જોવા મળ્યા
Updated: Feb 27th, 2023
મુંબઈ, તા.27 ફેબ્રુઆરી-2023, સોમવાર
ક્રિકેટ જગતમાં નવા વર્ષની શરૂઆતથી જ ઘણા ક્રિકેટરો લગ્નના બંધનમાં બંધાતા જોવા મળી રહ્યા છે, ત્યારે ભારતના સ્ટાર ક્રિકેટર શાર્દુલ ઠાકુરે મિતાલી પારુલકર સાથે લગ્ન કરી લીધા છે. બંનેએ મુંબઈમાં આયોજિત એક સમારોહમાં લગ્ન કર્યા. આ સમારોહમાં રોહિત શર્મા અને તેની પત્ની રિતિકા, ધનશ્રી, શ્રેયસ અય્યર અને દીપક ચાહરની બહેન માલતી ચહર પણ જોવા મળ્યા હતા. ભારતીય ક્રિકેટ ટીમના બે દિગ્ગજ ખેલાડી કેએલ રાહુલ અને અક્ષર પટેલે થોડા સમય પહેલા લગ્ન કર્યા હતા.
આ બંને ખેલાડીઓ બાદ હવે ભારતીય ટીમનો ઓલરાઉન્ડર શાર્દુલ ઠાકુરે પણ લગ્ન કરી લીધા છે. તાજેતરમાં તેમની તસવીરો સોશિયલ મીડિયા પર ઝડપથી વાયરલ થઈ રહી છે, જેમાં શાર્દુલ અને મિતાલી તેમની હળદરની સેરેમની ખૂબ એન્જોય કરી રહ્યાં છે. શાર્દુલ ઠાકુરે સોશિયલ મીડિયા પર તેની હળદરની સેરેમનીની કેટલીક તસવીરો શેર કરી છે. તેનો અન્ય એક વીડિયો પણ સોશિયલ મીડિયા પર વાયરલ થઈ રહ્યો છે, જેમાં તે પ્રખ્યાત મરાઠી ગીત ઝિંગાટ પર ડાન્સ કરી રહ્યો છે. શાર્દુલે તેની હલ્દી પર પીળો કુર્તો પહેર્યો છે અને તે લોકોના ખભા પર બેસીને ડાન્સ કરી રહ્યો છે. આ દરમિયાન શાર્દુલ અને મિતાલી એકબીજા પર ફૂલ ફેંકતા જોવા મળ્યા હતા. ફેન્સ આ જોડીને ખૂબ પસંદ કરી રહ્યા છે.
શાર્દુલ-મિતાલીની 2021માં થઈ હતી સગાઈ
ઉલ્લેખનિય છે કે, ભારતીય ટીમના ઓલરાઉન્ડર શાર્દુલ ઠાકુરે તેની ગર્લફ્રેન્ડ મિતાલી પારુલકર સાથે 29 નવેમ્બર 2021ના રોજ સગાઈ કરી હતી. મુંબઈમાં આયોજિત એક સમારોહમાં બંનેએ સગાઈ કરી હતી, જેમાં ટીમ ઈન્ડિયાનો કેપ્ટન રોહિત શર્મા પણ હાજર હતો. જો આપણે મિતાલી પારુલકર વિશે વાત કરીએ તો તે એક બિઝનેસવુમન છે. મિતાલી થાણેમાં ઓલ ધ બેક્સ નામની સ્ટાર્ટ-અપ કંપની ચલાવે છે. શાર્દુલ ઠાકુર અને મિતાલી બંને લાંબા સમયથી એકબીજાને ડેટ કરે છે અને હવે બંને એક નવું જીવન શરૂ કરવા જઈ રહ્યા છે.
