રોહિત શર્માનું નબળું પ્રદર્શન યથાવત્, જયસ્વાલ પણ સસ્તામાં આઉટ, રણજીમાં ફરી ફ્લોપ દેખાવ

Rohit & Jaiswal's poor performance in Ranji Trophy : રણજી ટ્રોફી 2024-25ની શરૂઆત થઇ ચૂકી છે. આ દરમિયાન બધાની નજર ભારતીય ક્રિકેટ ટીમના વનડે અને ટેસ્ટ ફોર્મેટના કેપ્ટન રોહિત શર્મા પર ટકેલી છે. જે લગભગ 9 વર્ષ અને 3 મહિના પછી રણજી ટ્રોફીમાં મુંબઈ તરફથી રમવા ઉતર્યો છે. જો કે રોહિત બાંદ્રાના કુર્લા કોમ્પલેક્ષમાં રમાઈ રહેલી આ મેચની બંને ઇનિંગ્સમાં કંઈ ખાસ પ્રદર્શન કરી શક્યો નથી.  

રોહિત શર્માનું નબળું પ્રદર્શન યથાવત્

બીજી ઈનિંગમાં રોહિત શર્મા ઝડપી બોલર યુદ્ધવીર સિંહ ચરકની શોર્ટ બોલ પર આબિદ મુશ્તાકના હાથે કેચ આઉટ થઇ ગયો હતો. રોહિતે 35 બોલનો સામનો કરીને 28 રન બનાવ્યા હતા. જેમાં 2 ચોગ્ગા અને 3 છગ્ગાનો સમાવેશ થાય છે. રોહિતે જ્યારે એક રન પર હતો ત્યારે ઉમર નજીર મીરે તેનો કેચ છોડી દીધો હતો. જો કે રોહિત આ જીવનદાનનો કોઈ ફાયદો ઉઠાવી શક્યો ન હતો.  

જયસ્વાલનું પણ નિરાશાજનક પ્રદર્શન

યુદ્ધવીર સિંહ ચરકે પોતાની શાનદાર બોલિંગ વડે યશસ્વી જયસ્વાલને પણ પવેલિયન ભેગો કરી દીધો હતો. યશસ્વીએ 51 બોલનો સામનો કરીને 26 રન બનાવ્યા હતા. જેમાં ચાર ચોગ્ગાનો સમાવેશ થાય છે. 27 વર્ષીય યુદ્ધવીર સિંહ મીડીયમ પેસર બોલર છે. તેનો જન્મ જમ્મુમાં થયો હતો. તે IPL 2025માં રાજસ્થાન રોયલ્સ તરફથી રમતો જોવા મળશે. રાજસ્થાને તેને IPL 2025ના મેગા ઓકશનમાં 35 લાખમાં ટીમમાં સમાવેશ કર્યો હતો. 

રોહિત શર્મા અને યશસ્વી જયસ્વાલ પહેલી ઇનિંગમાં કંઈ ખાસ પ્રદર્શન કરી શક્યા ન હતા. રોહિતે 19 બોલનો સામનો કરીને માત્ર 3 કરીને વિપક્ષી ટીમના કેપ્ટન પારસ ડોગરાના હાથે કેચ આઉટ થઇ ગયો હતો. બીજી તરફ યશસ્વી જયસ્વાલને ઝડપી બોલર આકિબ નબીએ LBW આઉટ કરી દીધો હતો. યશસ્વીએ માત્ર આઠ બોલ રમીને 4 રન કરી આઉટ થઇ ગયો હતો. 

મુંબઈનો ધબળકો

અહીં તમને જણાવી દઈએ કે મુંબઈએ ટોસ જીતીને પહેલા બેટિંગ કરવાનો નિર્ણય લીધો હતો. જેમાં ટીમે પહેલી ઇનિંગમાં 120 રન કરી શકી હતી. જવાબમાં જમ્મુ-કાશ્મીરે 206 રન બનાવ્યા હતા અને 86 રનની લીડ મેળવી હતી. ત્યારબાદ મુંબઈએ અત્યાર સુધીમાં 115 રનના સ્કોર પર 7 વિકેટ ગુમાવી દીધી છે.  

આ પણ વાંચોઃ ખેલાડીમાં ક્વૉલિટી હોય તો..', ટીમ ઇન્ડિયામાંથી પડતું મૂકાતાં 'હરફનમૌલા' ખેલાડીનું દર્દ છલકાયું

રોહિતે છેલ્લે વર્ષ 2015માં રણજી મેચ રમી હતી

છેલ્લે રોહિતે વર્ષ 2015ની રણજી મેચમાં રમ્યો હતો. ત્યારે રોહિતે ઉત્તર પ્રદેશ સામે વાનખેડે સ્ટેડીયમમાં 113 રનની જોરદાર ઇનિંગ રમી હતી. રોહિતે અત્યાર સુધીમાં ફર્સ્ટ ક્લાસ ક્રિકેટમાં 9318 રન બનાવ્યા છે. જેમાં તેનો સર્વશ્રેષ્ઠ સ્કોર 309 રહ્યો છે. આ સિવાય રોહિતે ફર્સ્ટ ક્લાસ ક્રિકેટમાં 24 વિકેટ ઝડપી છે.