બેંગલુરૂએ પ્લેઑફમાં પહોંચવા માટે કર્યા '7 ચમત્કાર', જાણો કેવી રીતે હારેલી બાજી પલટી

IPL 2024 : રૉયલ ચેલેન્જર્સ બેંગલુરૂએ રોમાંચક મુકાબલામાં ચેન્નઈ સુપર કિંગ્સને હરાવ્યા બાદ આઈપીએલ 2024ના પ્લેઑફમાં જગ્યા બનાવી લીધી છે. બેંગલુરૂ માટે પ્લેઑફમાં જવાનો રસ્તો ખુબ કઠીન હતો. આ ટીમે જે રીતે શરૂઆત કરી હતી તેનાથી લાગી રહ્યું ન હતું કે આ ટીમ પ્લેઑફમાં પહોંચી શકશે. પરંતુ આ ટીમે કેટલાક ચમત્કાર કર્યા જેના કારણે તેણે પ્લેઑફમાં જગ્યા બનાવી લીધી.

પ્લેઑફમાં આવવા માટે બેંગલુરૂએ ખુબ મહેનત કરી અને સતત મેચ જીતતા આ સફળતા મેળવી. આ રેસમાં બેંગલુરૂએ અનેક રેકોર્ડ તોડ્યા અને બનાવ્યા. એવા કામ કર્યા જે કરવા સરળ ન હતા. એવી ક્રિકેટ રમી જે ખુબ મુશ્કેલ હતી.

બનાવ્યા અનેક રેકોર્ડ

1. બેંગલુરૂ ટીમ માટે પ્લેઓફમાં જવું મુશ્કેલ હતું. તેને પ્લેઓફમાં જવા માટે સતત છ મેચ જીતવાની હતી અને દરેક મેચ તેના માટે કરો યા મરો હતી. તેનો અર્થ એ કે તેઓ એક મેચ પણ હારે તો પ્લેઓફમાં જવાનો તેમનો રસ્તો બંધ. આઈપીએલમાં બેંગલુરૂની આ બીજી સૌથી મોટી જીતનો સિલસિલો છે. અગાઉ 2011માં બેંગલુરૂએ સતત સાત જીત હાંસલ કરી હતી. 2009માં બેંગલુરૂએ સતત પાંચ મેચ જીતી હતી અને 2016માં પણ.

2. બેંગલુરૂએ તેની પ્રથમ આઠ મેચમાં માત્ર એક મેચ જીતી હતી. કોઈપણ આઈપીએલ સિઝનમાં પ્લેઓફમાં પહોંચેલી ટીમો દ્વારા પ્રથમ આઠ મેચોમાં જીતવામાં આવેલી આ સૌથી ઓછી મેચ હતી. એટલે કે આઈપીએલની પ્રથમ આઠ મેચમાંથી માત્ર એક મેચ જીતીને બેંગલુરૂ પહેલા કોઈ ટીમ પ્લેઓફમાં પહોંચી નથી.

3. બેંગલુરૂએ લીગ તબક્કામાં સતત છ મેચ જીતી હતી. આ સાથે આ ટીમ લીગ તબક્કામાં છેલ્લી છ મેચ જીતીને પ્લેઓફમાં પહોંચનારી બીજી ટીમ બની ગઈ છે. અગાઉ 2014માં કોલકાતાએ સતત સાત મેચ જીતીને પ્લેઓફમાં જગ્યા બનાવી હતી.

4. ચેન્નાઈ અને બેંગલુરૂ વચ્ચે 18 મેના રોજ મેચ રમાઈ હતી. આ તારીખે આઈપીએલમાં બેંગલુરૂની આ પાંચમી જીત છે. બેંગલુરૂએ આ તારીખે રમાયેલી તમામ મેચો જીતી છે. તેણે ચેન્નાઈને ત્રણ વખત હરાવ્યું છે. બેંગલુરૂએ વર્ષ 2013, 2014 અને 2024માં 18 મેના રોજ ચેન્નાઈને હરાવ્યું હતું. આ સિવાય 2016માં પંજાબ અને 2023માં સનરાઈઝર્સ હૈદરાબાદને હાર મળી હતી.

5. આઈપીએલ-2024માં બેંગલુરૂના બેટ્સમેનોએ અત્યાર સુધીમાં 157 સિક્સર ફટકારી છે. આ સાથે બેંગલુરૂ ટી20 ટૂર્નામેન્ટમાં 150થી વધુ સિક્સર મારનારી પ્રથમ ટીમ બની ગઈ છે.

6. બેંગલુરૂએ આ સિઝનમાં છ વખત 200થી વધુ રનના આંકડાને સ્પર્શ કર્યો છે. બેંગલુરૂ સિવાય મુંબઈ અને કોલકાતાએ એક સિઝનમાં છ વખત 200થી વધુ રન બનાવ્યા છે. મુંબઈએ ગયા વર્ષે 16 મેચમાં છ વખત આ કામ કર્યું હતું, જ્યારે કોલકાતાએ આ સિઝનમાં આ કામ કર્યું હતું. કોલકાતા અને બેંગલુરૂ બંને પ્લેઓફમાં છે અને આ બંને ટીમ આ આંકડો પાર કરી શકે છે.

7. કોહલીએ ચેન્નાઈ સામેની મેચમાં 47 રનની ઈનિંગ રમી હતી અને આ સાથે તેણે ચિન્નાસ્વામી સ્ટેડિયમમાં આઈપીએલના 3000 રન પૂરા કર્યા હતા. આઈપીએલમાં કોઈપણ એક ગ્રાઉન્ડ પર 3000 રન બનાવનાર તે પ્રથમ બેટ્સમેન છે. આ સિવાય કોહલીએ ભારતની ધરતી પર T20માં 9000 રનનો આંકડો પણ પાર કર્યો અને આ સાથે તે કોઈ એક દેશમાં આ સિદ્ધિ મેળવનાર પ્રથમ ખેલાડી બન્યો.