VIDEO : ધોની પહેલા જાડેજાએ એન્ટ્રી કરતા CSKના હજારો ચાહકો થઈ ગયા ગુસ્સે, પછી જે થયું તે...

Ravindra Jadeja Teased Chepauk Crowd : રવિન્દ્ર જાડેજા ચેન્નઈ સુપર કિંગ્સના ચાહકોને ખૂબ સારી રીતે ઓળખી ગયો છે. તે જાણે છે કે જ્યારે ચેન્નઈના ચેપોક સ્ટેડિયમમાં IPLની મેચ હોય છે ત્યારે ત્યાંના દર્શકો માટે એમએસ ધોનીથી મોટો સ્ટાર કોઈ નથી. દરેક ચાહક એમએસ ધોનીને મેદાન પર બેટિંગ કરતા જોવા માંગે છે. રવિન્દ્ર જાડેજાએ કોલકાતા નાઈટ રાઈડર્સ સામે ગઈકાલે રમાયેલી IPL 2024ની 22મી લીગ મેચમાં ચેન્નઈના દર્શકો સાથે મજાક કરી હતી. આનાથી એમએસ ધોનીના હજારો ચાહકો નારાજ થઈ શક્યા હોત, પરંતુ થોડા સમયમાં બધું શાંત થઇ ગયું હતું.

જાડેજાએ ચેપોકમાં દર્શકો સાથે કરી મજાક

ચેન્નઈ સુપર કિંગ્સની ટીમ KKR સામે મજબૂત સ્થિતિમાં હતી. શિવમ દુબે 17મી ઓવરમાં આઉટ થયો હતો. ત્યાંથી CSKને જીતવા માટે માત્ર 3 રનની જરૂર હતી. આવી સ્થિતિમાં જો કોઈપણ બેટર આવ્યો હોત તો પણ CSKની જીત થઈ હોત, પરંતુ ચાહકો ધોની...ધોનીના નારા લગાવી રહ્યા હતા. જો કે વિકેટ પડી રહી ન હતી. જ્યારે શિવમ દુબે આઉટ થયો ત્યારે ફરીથી ધોની...ધોની...ધોનીના નારા લાગ્યા હતા. આવી સ્થિતિમાં ધોની બેટિંગ કરવા આવ્યો, પરંતુ તે પહેલા રવિન્દ્ર જાડેજાએ CSKના હજારો પ્રશંસકો સાથે મજાક કરી હતી. જાડેજા ધોની પહેલા ડ્રેસિંગ રૂમમાંથી બહાર આવ્યો અને ફેન્સને બતાવવાનો પ્રયાસ કર્યો કે ધોની નહીં પણ તે બેટિંગ કરવા જઈ રહ્યો છે.

નોઈસ મીટર પર 125dbનો અવાજ રેકોર્ડ કરવામાં આવ્યો

જાડેજાએ માત્ર ડગઆઉટ પાર કર્યો હતો, પરંતુ ટૂંક સમયમાં તે પાછો ફર્યો. જો જાડેજા બે-ચાર ડગલાં આગળ વધ્યો હોત, તો તેણે ચેન્નઈના ચાહકોને ચોક્કસપણે નારાજ કરી દીધા હોત. જો કે ટૂંક સમયમાં જ ધોની હેલ્મેટ પહેરીને અને હાથમાં બેટ લઈને મેદાનમાં આવ્યો અને પછી સ્ટેડિયમમાં જે અવાજ સંભળાયો તે સુનામીથી ઓછો ન હતો, કારણ કે જે સમયે ધોની બેટિંગ કરવા માટે ક્રિઝ પર પહોંચ્યો ત્યારે નોઈસ મીટર પર 125dbનો અવાજ રેકોર્ડ કરવામાં આવ્યો હતો, જે માનવ કાન માટે ઘાતક સાબિત થઈ શકે છે. જો કે મેચ ટૂંક સમયમાં સમાપ્ત થઈ ગઈ અને CSK જીતી ગઈ. ધોનીએ ત્રણ બોલમાં એક રન બનાવ્યો હતો.