બાબર આઝમના રાજીનામાં બાદ પાકિસ્તાન ટીમને મળ્યા 2 નવા કેપ્ટન, PCBએ કરી જાહેરાત

Pakistan Team New Captain : વનડે વર્લ્ડ કપ 2023માં શરમજનક પ્રદર્શન બાદ પાકિસ્તાન ક્રિકેટ ટીમમાં ભૂકંપ આવ્યો છે. બુધવારે સાંજે જ બાબર આઝમે ત્રણેય ફોર્મેટમાં કેપ્ટનશીપથી રાજીનામું આપી દીધું છે. તેના થોડા સમય બાદ જ પાકિસ્તાન ક્રિકેટ બોર્ડ (PCB)એ નવા કેપ્ટનોનું એલાન પણ કરી દીધું છે.

PCBએ અલગ-અલગ ફોર્મેટમાં 2 નવા કેપ્ટનની નિમણૂંક કરી છે. ટેસ્ટ ટીમની કમાન સ્ટાર બેટ્સમેન શાન મસૂદને મળી છે. જ્યારે ટી20 ફોર્મેટની કમાન ફાસ્ટ બોલર શાહીન શાહ આફરીદીના હાથમાં રહેશે. PCBએ સોશિયલ મીડિયા પોસ્ટ દ્વારા આ માહિતી આપી છે. PCBએ વનડે ટીમના કેપ્ટનની નિમણૂંક નથી કરી.

PCBએ પહેલી પોસ્ટ ડિલીટ કરી

જણાવી દઈએ કે, PCBએ સૌથી પહેલા એક ટ્વિટ કરીને નવા કેપ્ટનની નિમણૂંકની માહિતી આપી હતી, તેમાં આફરીદીને વ્હાઈટ બૉલ ફોર્મેટ એટલે T20 અને વનડે બંનેમાં કેપ્ટન બનાવાયો હતો. પરંતુ PCBએ બાદમાં તે પોસ્ટ ડિલીટ કરી દીધી. ત્યારબાદ બીજી પોસ્ટ શેર કરતા જણાવ્યું કે, આફરીદી માત્ર T20ના કેપ્ટન છે.

તેવામાં અંદાજ લગાવાય રહ્યો છે કે, વનડે ફોર્મેટની કપ્તાની ત્રીજા પ્લેયરને મળી શકે છે. આ રીતે પાકિસ્તાન ટીમમાં ત્રણ ફોર્મેટ એટલે ટેસ્ટ, વનડે અને T20 ઈન્ટરનેશનલમાં અલગ અલગ કેપ્ટન હોય શકે છે.