VIDEO : રિઝવાને ઓસ્ટ્રેલિયન ખેલાડીને પૂછ્યું રિવ્યૂ લઈએ કે નહીં, મજેદાર વીડિયો થયો વાઈરલ

PAK Vs AUS : તાજેતરમાં પાકિસ્તાન ક્રિકેટ બોર્ડ(PCB)એ મોહમ્મદ રિઝવાનને મર્યાદિત ઓવરોના ફોર્મેટમાં નવા કેપ્ટન તરીકે નિયુક્ત કર્યો છે. હવે તેના નેતૃત્ત્વમાં પાકીસ્તાની ટીમ ઓસ્ટ્રેલિયા સામેની ત્રણ મેચની વનડે સીરિઝ રમી રહી છે.  જેમાં પાકિસ્તાનને પહેલી મેચમાં ત્રણ વિકેટે હારનો સામનો કરવો પડ્યો હતો. જો કે બીજી મેચમાં શાનદાર વાપસી કરીને પાકિસ્તાને ઓસ્ટ્રેલિયાને માત્ર 163 રનમાં ઓલઆઉટ કરી દીધું હતું. પાકિસ્તાન અને ઓસ્ટ્રેલિયા વચ્ચે એડિલેડમાં બીજી વનડે મેચ રમાઈ રહી હતી. આ મેચમાં હરિસ રઉફ અને શાહીન આફ્રિદીએ સાથે મળીને ઓસ્ટ્રેલિયન બેટિંગ લાઇનઅપને ધરાશાયી કરી દીધી હતી. હરિસ રઉફે પાંચ અને શાહીને ત્રણ વિકેટ ઝડપી હતી.

આ સિવાય નસીમ શાહ અને મોહમ્મદ હસનૈને એક-એક વિકેટ લીધી હતી. ઓસ્ટ્રેલિયા તરફથી સ્ટીવ સ્મિથે સૌથી વધુ રન બનાવ્યા હતા. સ્મિથે 48 બોલમાં 35 રનની ઇનિંગ રમી હતી. આ મેચ દરમિયાન રિઝવાને કંઈક એવું કર્યું હતું કે, જેનો વીડિયો સોશિયલ મીડિયા પર વાઈરલ થઈ રહ્યો છે. રિઝવાને નસીમ શાહના બોલ પર એડમ ઝમ્પા સામે કેચ માટેની જોરદાર અપીલ કરી હતી.

આ ઘટના ઓસ્ટ્રેલિયા જ્યારે બેટિંગ કરી રહ્યું હતું ત્યારે 33મી ઓવરના ત્રીજા બોલ પરની છે. નસીમ શાહ બોલિંગ કરી રહ્યો હતો. ત્યારે રિઝવાને ઝમ્પાને જ પૂછ્યું કે, 'શું તેણે રિવ્યુ લેવો જોઈએ?' ઝમ્પાએ પહેલા કહ્યું કે, 'તમે દરેક બોલ પર અપીલ કરો છો.' ફરીથી રિઝવાને પૂછ્યું કે, 'મારે આના પર રિવ્યૂ લેવો જોઈએ કે નહીં.' તેના પર ઝમ્પાએ કહ્યું કે, 'હા, રિવ્યૂ ચોક્કસ લેવો જોઈએ.' ત્યારબાદ રિઝવાને રિવ્યુ લીધો અને તેમાં ઝમ્પા નોટ આઉટ હતો. આ બધું જોઈને કોમેન્ટેટર્સ પણ હસવા લાગ્યા હતા.

આ પણ વાંચો : IPL 2025 મેગા ઓક્શનમાં ગોવિંદાના જમાઈએ પણ ઝંપલાવ્યું, દોઢ કરોડ રૂપિયા રાખી બેઝ પ્રાઇસ

તે સમયે ઓસ્ટ્રેલિયાનો સ્કોર 153 રન હતો. બાદમાં ઓસ્ટ્રેલિયાની ટીમ 163ના સ્કોર પર ઓલઆઉટ થઈ ગઈ હતી. તે સમયે ઝમ્પા 10 રન બનાવીને રમી રહ્યો હતો. જો કે પછી તે 18 રન બનાવીને આઉટ થઇ ગયો હતો. જવાબમાં પાકિસ્તાની ઓપનર સૈમ અયૂબ અને અબ્દુલ્લા શફીકે ટીમને સારી શરૂઆત અપાવી હતી.