VIDEO : વાનખેડે સ્ટેડિયમમાં ટીમ ઈન્ડિયાના ખેલાડીઓએ કર્યો ડાન્સ, રોહિતે હાર્દિક-સૂર્યાના કર્યા વખાણ

Team India Parade : મુંબઈના દરિયા કાંઠે આવેલા મરીન ડ્રાઈવથી વાનખેડે સ્ટેડિયમ સુધી આજે આહલાદક વાતાવરણની સાથે ટી20 વર્લ્ડકપમાં જીતનો અનેરો ઉત્સાહ જોવા મળી રહ્યો છે. ભારતીય ક્રિકેટરોની ટીમે મરીન ડ્રાઈવથી વાનખેડે સ્ટેડીયમ સુધી ખુલ્લી બસમાં રોડ-શો કર્યો હતો. આ દરમિયાન ચોતરફ ચાહકોની કિયારીઓ ઉભરાઈ હતી. ટીમ ઈન્ડિયાના ખેલાડીઓએ સ્ટેડિયમ પહોંચ્યા બાદ અહીં ડાન્સ પણ કર્યો હતો. આ દરમિયાન ભારતીય ટીમના કોચ રાહુલ દ્રવિડ, સુકાની રોહિત શર્મા, વિરાટ કોહલી સહિતના ખેલાડીઓએ પોતાના પ્રતિભાવો રજુ કર્યા હતા. 

હું આ પ્રેમને મિસ કરીશઃ દ્રવિડ

ભારતને ટી20 વર્લ્ડકપ જીતાડવામાં મહત્વનું યોગદાન આપનાર કોચ રાહુલ દ્રવિડે પોતાના અનુભવને યાદ કરી કહ્યું કે, ‘હું આ પ્રેમને મિસ કરીશ. આજે આપણે જે જોયું તે અદ્ભુત છે. લોકો અને ચાહકોનો પ્રેમ... ચાહકોએ જ ક્રિકેટને દેશની સૌથી મોટી રમત બનાવી છે.’

રોહિતે પંડ્યાને કરી સલામ

રોહિત શર્માએ છેલ્લી ઓવરમાં હાર્દિક પંડ્યાની બોલિંગના વખાણ કરતા કહ્યું કે, ‘તેને સલામ’ તેણે ડેવિડ મિલરનો કેચ પકડનાર સૂર્યકુમાર યાદવની પણ પ્રશંસા કરી હતી. તેણે T20 વર્લ્ડ કપની જીત સમગ્ર ટીમને સમર્પિત કરી કહ્યું કે, ભારતની T20 વર્લ્ડ કપ જીત ટીમના પ્રયાસોનું પરિણામ છે. ભારતને આઈસીસીનો ખિતાબ જીતાડવામાં બધાએ પોતાનું સર્વશ્રેષ્ઠ પ્રદર્શન કર્યું છે.

આ ટ્રોફી આખા દેશ માટે છેઃ રોહિત

વાનખેડે સ્ટેડિયમમાં રોહિત શર્માએ દરેકનો આભાર વ્યક્ત કરી કહ્યું કે, ‘જ્યારથી અમે ભારતમાં આવ્યા છીએ ત્યારથી અદ્ભુત ખુશી થઈ રહી છે. આ ટ્રોફી સમગ્ર દેશ માટે છે. વડાપ્રધાનને મળવું એ ખૂબ જ સન્માનની વાત હતી. ટીમ અને BCCI વતી હું દરેકનો આભાર માનું છું. હું ખરેખર ખૂબ જ ખુશ અને રાહત અનુભવું છું.’

વાનખેડેમાં ખેલાડીઓએ કર્યો ડાન્સ

ટીમ ઈન્ડિયાના ખેલાડીઓએ વાનખેડે સ્ટેડિયમમાં પહોંચી ડાન્સ કર્યો હતો.

મરીન ડ્રાઈવ પર ભારે જનમેદની, BCCIએ ફોટો શેર કર્યો

મુંબઈના મરીન ડ્રાઈવ પર ક્રિકેટરોની ઝલક મેળવવા બહોળી સંખ્યામાં ચાહકો આવ્યા છે. તો બીજીતરફ ભારતીય ક્રિકેટ કંટ્રોલ બોર્ડ (BCCI)એ અહીં ઉમટેલી જનમેદનીનો પોટો પણ શેર કર્યો છે.

હાર્દિક પંડ્યાનું ટ્વીટ

હાર્દિક પંડ્યાએ વિજય પરેડ પહેલા એક્સ પર પોસ્ટ શેર કરી હતી. આમાં તેણે ટ્રોફી સાથે તસવીર પોસ્ટ કરીને લખ્યું છે કે, ‘જલદી મળીશું, વાનખેડે.’

ક્રિકેટ ચાહકોએ એમ્બ્યુલન્સને બહાર કાઢવામાં મદદ કરી

ટીમ ઈન્ડિયાની એક ઝલક માટે મુંબઈના રસ્તાઓ પર ભારે ભીડ ઉમટી છે. ખાસ કરીને મરીન ડ્રાઈવમાં હજારોની સંખ્યામાં ભીડ એકઠી થઈ ગઈ છે, ત્યારે મરીન ડ્રાઈવ ખાતે એકત્ર થયેલા ક્રિકેટ ચાહકોએ એમ્બ્યુલન્સને ભીડમાંથી પસાર થવા માટે રસ્તો બનાવ્યો હતો.

મુંબઇ પોલીસે કરી અપીલ

ભારતીય ટીમ મુંબઇ એરપોર્ટ પર લેન્ડ કરી ચૂકી છે. BCCI મુજબ, વિજય પરેડ સાંજે 5 વાગ્યે શરૂ થવાની હતી, પરંતુ ફ્લાઇટ મોડી થવાને કારણે આ કાર્યક્રમના સમયમાં ફેરફાર કરવામાં આવ્યો છે અને હવે થોડી દેર બાદ વિજય પરેડ શરૂ થવા જઇ રહી છે.