ટીમ ઈન્ડિયાનો નવો કેપ્ટન ફાઈનલ! મજબૂત વાઈસ કેપ્ટનની શોધખોળ શરૂ, જાણો કોણ કોણ રેસમાં

Test Captaincy: તાજેતરની ટેસ્ટ સિઝનમાં ભારતનું પ્રદર્શન ખૂબ જ નિરાશાજનક રહ્યું હતું. આ સમયગાળા દરમિયાન ટીમ ઈન્ડિયાને ઘરઆંગણે ન્યુઝીલેન્ડ સામે ક્લીન સ્વીપ કરવું પડ્યું અને પછી ઓસ્ટ્રેલિયામાં બોર્ડર-ગાવસ્કર ટ્રોફી પણ હારી ગઈ. હવે ટેસ્ટમાં ભારતનો આગામી પડકાર ઈંગ્લેન્ડ પ્રવાસ છે, જે 20 જૂનથી શરૂ થશે. આ પ્રવાસને જોતા ભારતીય ટીમમાં કેટલાક મોટા ફેરફારો થઈ શકે છે, જેમાંથી એક લીડરશિપ ગ્રુપ છે. 

ટેસ્ટ ટીમનો કેપ્ટન બની શકે છે બુમરાહ 

એવું માનવામાં આવે છે કે હવે રોહિત શર્મા જે અત્યાર સુધી કેપ્ટન પદ પર હતો તેને ટેસ્ટ ટીમમાં તક નહીં મળે. જેની જગ્યા હવે ફાસ્ટ બોલર જસપ્રીત બુમરાહ લઇ શકે છે. બુમરાહે સિડની ટેસ્ટમાં જ્યારે રોહિત આઉટ થયો ત્યારે કેપ્ટન્સી કરી હતી. જો કે, બુમરાહના વાઈસ કેપ્ટન કોણ હશે તે અંગે પણ ચર્ચા ચાલી રહી છે. જેમાં ઋષભ પંતની સાથે યશસ્વી જયસ્વાલનું નામ પણ સામે આવી રહ્યું છે. જસપ્રીત બુમરાહે છેલ્લા કેટલાક સમયથી કેપ્ટનશિપના મોરચે પોતાની ખાસ છાપ છોડી છે. તેને ઘણી તકો ન મળી પરંતુ જ્યારે પણ તેણે નેતૃત્વ કર્યું ત્યારે તેણે બતાવ્યું કે તેની પાસે ટીમનું નેતૃત્વ કરવાની ક્ષમતા છે. 

આનું સૌથી મોટું ઉદાહરણ પર્થમાં જોવા મળ્યું, જ્યાં ભારતે તાજેતરની ટેસ્ટ સિરીઝની પ્રથમ મેચમાં ઓસ્ટ્રેલિયાને 295 રનથી હરાવ્યું હતું. જોકે, આ ફાસ્ટ બોલરને લાંબા સમય સુધી કેપ્ટન બનાવવાના નિર્ણયમાં ફિટનેસ આડે આવી રહી છે. બુમરાહને ઓસ્ટ્રેલિયા સામેની પાંચમી ટેસ્ટમાં ગંભીર ઈજા થઇ હતી, જેથી તે બીજી ઈનિંગમાં એક પણ ઓવર નાખી શક્યો ન હતો અને હવે તેની પીઠમાં સોજો આવવાને કારણે તે ચેમ્પિયન્સ ટ્રોફીમાંથી બહાર થઈ શકે છે.

આ ખેલાડીઓ છે વાઈસ કેપ્ટન બનવા માટે છે મજબૂત દાવેદાર 

જો કે, જો બુમરાહ ફિટ રહે છે અને ઈંગ્લેન્ડ પ્રવાસ પર ટીમની બાગડોર સંભાળે છે, તો તેને તેના વાઈસ કેપ્ટનની પણ જરૂર પડશે. રોહિતના વાઈસ કેપ્ટન તરીકે બુમરાહને જવાબદારી મળી હતી. આવી સ્થિતિમાં બુમરાહનો સાથ આપવાની રેસમાં વિકેટકીપર બેટ્સમેન ઋષભ પંતનું નામ સામે આવી રહ્યું છે, તેની સાથે યશસ્વી જયસ્વાલ પણ આ રેસમાં જોડાઈ ગયો છે.

આ પણ વાંચો: IPL પહેલા પંજાબ કિંગ્સના નવા કેપ્ટનની જાહેરાત, શ્રેયસ અય્યરને સોંપાઈ કમાન

જસપ્રીત બુમરાહની ઈજાના ડરને કારણે ઘણા ભૂતપૂર્વ ક્રિકેટરો તેને લાંબા ગાળાની કેપ્ટનશીપનો વિકલ્પ નથી માનતા. આવી સ્થિતિમાં, વાઇસ-કેપ્ટન્સીના મોરચે મજબૂત ઉમેદવારને તક આપવાની જરૂરિયાતને ધ્યાનમાં રાખીને, ઋષભ પંત અથવા યશસ્વી જયસ્વાલને જવાબદારી સોંપવામાં આવી શકે છે. જોકે, મીડિયા રિપોર્ટના આધારે પંતનો દાવો વધુ મજબૂત છે.