IPLમાં ઈતિહાસ રચવાથી બુમરાહ માત્ર 2 વિકેટ દૂર, હરભજનને પાછળ છોડવાની તક

Jasprit Bumrah :  IPL 2024ની આઠમી મેચમાં આજે સનરાઈઝર્સ હૈદરાબાદ અને હાર્દિક પંડ્યાની આગેવાની હેઠળની મુંબઈ ઈન્ડિયન્સ વચ્ચે ટક્કર થશે. બંને ટીમો વચ્ચેની મેચ હૈદરાબાદના રાજીવ ગાંધી ઈન્ટરનેશનલ સ્ટેડિયમમાં સાંજે 7.30 વાગ્યાથી રમાશે. આ પહેલા સનરાઈઝર્સ હૈદરાબાદને કોલકાતા નાઈટ રાઈડર્સ સામે હારનો સામનો કરવો પડ્યો હતો. જ્યારે ગુજરાત ટાઇટન્સે મુંબઈ ઈન્ડિયન્સને હરાવ્યું હતું. જસપ્રીત બુમરાહે ગુજરાત સામે શાનદાર પ્રદર્શન કર્યું હતું. બુમરાહે 4 ઓવરમાં 14 રન આપીને 3 વિકેટ લીધી હતી. હવે ટીમ ફરી એકવાર તેની પાસેથી આવી જ બોલિંગની અપેક્ષા રાખશે. બુમરાહ પાસે હૈદરાબાદના મેદાન પર એક ખાસ રેકોર્ડ બનાવવાની પણ તક હશે. તે IPLમાં મુંબઈ ઇન્ડિયન્સ માટે 150 વિકેટ પૂરી કરવાની નજીક છે.

બુમરાહ ઈતિહાસ રચવાથી માત્ર 2 વિકેટ દૂર

બુમરાહ આજની મેચમાં 2 વિકેટ લેતાની સાથે IPLમાં કોઈપણ એક ટીમ માટે 150 વિકેટ લેનારો પ્રથમ ભારતીય ફાસ્ટ બોલર બની જશે. તેણે વર્ષ 2013માં મુંબઈ ઇન્ડિયન્સ માટે ડેબ્યુ કર્યું હતું. હવે તે ઈતિહાસ રચવાની નજીક છે. અત્યાર સુધી માત્ર એક જ ફાસ્ટ બોલરે IPLમાં કોઈપણ એક ટીમ માટે 150થી વધુ વિકેટ લીધી છે. શ્રીલંકાના લસિથ મલિંગાએ આ સિદ્ધિ મેળવી છે. તેણે મુંબઈ માટે 122 મેચમાં 170 વિકેટ લીધી છે. હવે તે ટીમનો બોલિંગ કોચ છે.

સુનીલ નારાયણે પણ મેળવી આ સિદ્ધિ

મલિંગા ઉપરાંત કોલકાતા નાઈટ રાઈડર્સના સ્પિનર ​​સુનીલ નારાયણે પણ KKR માટે 150થી વધુ વિકેટ ઝડપી છે. તેણે KKR માટે 163 મેચમાં 164 વિકેટ લીધી છે. જો સ્પિન બોલરો સિવાય ફાસ્ટ બોલરોની વાત કરીએ તો ભારતીય ખેલાડીઓમાં બુમરાહ પછી ભુવનેશ્વર કુમારનો નંબર આવે છે. તેણે સનરાઇઝર્સ માટે 130 મેચમાં 146 વિકેટ લીધી છે. તેની પાસે પણ SRH માટે 150 વિકેટ લેવાની તક છે. આ માટે ભુવીએ મુંબઈ સામે 4 વિકેટ લેવી પડશે.

હરભજનને પાછળ છોડશે બુમરાહ!

IPLમાં સૌથી વધુ વિકેટ લેનારા બોલરોની યાદીમાં બુમરાહ 11માં સ્થાને છે. તેની પાસે ટોપ-10માં સામેલ થવાની તક છે. જો બુમરાહ ત્રણ વિકેટ લેશે તો તે હરભજન સિંહને પાછળ છોડી દેશે. હરભજને તેના IPL કરિયરમાં 150 વિકેટ લીધી છે. તે મુંબઈ ઈન્ડિયન્સ, ચેન્નઈ સુપર કિંગ્સ અને કોલકાતા નાઈટ રાઈડર્સની ટીમનો ભાગ રહ્યો છે.