VIDEO : બુમરાહે કરી અશ્વિનની નકલ, પ્રેક્ટિસ સેશનનો મજેદાર વીડિયો આવ્યો સામે

Jasprit Bumrah Imitates R Ashwin Bowling Action : સાઉથ આફ્રિકા સામે બીજી ટેસ્ટ મેચ પહેલા ભારતીય ખેલાડીઓનો એક મજેદાર વીડિયો સામે આવ્યો છે. આ વીડિયોમાં ભારતીય ટીમનો સ્ટાર ફાસ્ટ બોલર જસપ્રીત બુમરાહ દિગ્ગજ સ્પિનર રવિચંદ્રન અશ્વિનની નકલ કરતો જોવા મળી રહ્યો છે. આ દરમિયાન અશ્વિન પણ બુમરાહને ચુપચાપ જોઈ રહ્યો હતો.

બુમરાહે કરી અશ્વિનની નકલ

સોશ્યલ મીડિયા પર શેર કરવામાં આવેલા આ વીડિયોમાં પ્રેક્ટિસ સેશન દરમિયાન બુમરાહ બોલિંગ કરતો જોવા મળી રહ્યો છે. તે અશ્વિનની જેમ રન-અપ લેતો જોવા મળી રહ્યો છે. આ સાથે બુમરાહની બોલને પકડવાની સ્ટાઈલ અને તેના હાથની હિલચાલ પણ અશ્વિન જેવી જ છે. બુમરાહ બોલિંગ એક્શન બાદ ફોલો થ્રુ પણ અશ્વિન જેવો જ રાખે છે. આ જોઇને યુવા ફાસ્ટ બોલર પ્રસિદ્ધ કૃષ્ણા પણ હસવા લાગે છે. આ સાથે ભારતીય ટીમના હેડ કોચ રાહુલ દ્રવિડ પણ આ મજાક-મસ્તીને જોઈ રહ્યા હતા.

સીરિઝ ડ્રો કરવાના ઈરાદા સાથે ભારત ઉતરશે મેદાનમાં

ભારતીય ક્રિકેટ ટીમ આજે કેપ ટાઉનમાં સાઉથ આફ્રિકા સાથે ટકરાશે. ભારત અને સાઉથ આફ્રિકા વચ્ચે રમાઈ રહેલી 2 મેચની ટેસ્ટ સીરિઝની બીજી મેચ આજે બપોરે 1:30 વાગ્યે શરુ થશે. પ્રથમ ટેસ્ટ મેચમાં ભારતને એક ઇનિંગ અને 32 રનથી હારનો સામનો કરવો પડ્યો હતો. આ સાથે જ ભારતનું સાઉથ આફ્રિકામાં પ્રથમ વખત ટેસ્ટ સીરિઝ જીતવાનું સપનું તૂટી ચુક્યું છે. હવે ભારતીય ટીમ આ ટેસ્ટ સીરિઝને ડ્રો કરવાના ઈરાદા સાથે મેદાનમાં ઉતરશે.