IPL 2025 ક્યારથી શરૂ થશે? BCCIના ઉપાધ્યક્ષે કરી તારીખની જાહેરાત

Indian Premier League 2025: આઈપીએલ 2025ની શરૂઆતને લઈને ભારતીય ક્રિકેટ કંટ્રોલ બોર્ડે મોટી અપડેટ આપી છે. રવિવારે (12 જાન્યુઆરી, 2025) સમાચાર એજન્સી ANI તરફથી જાહેર કરાયેલા વીડિયોમાં BCCIના ઉપાધ્યક્ષ રાજીવ શુક્લાએ જણાવ્યું કે, 23 માર્ચથી આઈપીએલ 2025ની શરૂઆત થશે. એટલે કે આ દિવસે ટૂર્નામેન્ટની ઓપનિંગ મેચ રમાશે. જ્યારે ફાઈનલ મેચ 25 મેના રોજ રમાશે. આઈપીએલને લઈને આ મોટી અપડેટ BCCIની સ્પેશિયલ જનરલ મીટિંગ બાદ આવી છે. જો કે, હજુ સુધી શેડ્યૂલની જાહેરાત કરાઈ નથી. જણાવી દઈએ કે, નવેમ્બર 2024ના અંતમાં 2 દિવસ મેગા ઓક્શન સાઉદી અરબના જેદ્દામાં યોજાયું. 

રાજીવ શુક્લાએ જણાવ્યું કે, 'મીટિંગમાં એક જ મુદ્દો હતો, તે કોષાધ્યક્ષ અને સચિવની પસંદગીનો હતો. WPL (મહિલા પ્રીમિયર લીગ)ના વેન્યૂ પણ સ્પષ્ટ છે, જેની જાહેરાત ટુંક સમયમાં થશે. IPL કમિશ્નરની નિમણૂક પણ એક વર્ષ માટે કરી દેવાઈ છે.'

દેવજીત સાઈકિયા બન્યા BCCIના નવા સેક્રેટરી

અત્રે ઉલ્લેખનીય છે કે, મુંબઈમાં BCCIની આ બેઠકમાં સચિવ અને કોષાધ્યક્ષની પસંદગી થઈ. આસામના ભૂતપૂર્વ ક્રિકેટર દેવજીત સાઈકિયાને ભારતીય ક્રિકેટ કંટ્રોલ બોર્ડ (BCCI)ના સેક્રેટરી બનાવવામાં આવ્યા છે. ઓસ્ટ્રેલિયા સીરિઝ પર ભારતના ખરાબ પર્ફોર્મન્સ મુદ્દે આયોજિત બેઠકમાં સાઈકિયા સેક્રેટરી તરીકે BCCIના ચેરમેન રોજર બિન્ની સાથે બેઠકમાં ઉપસ્થિત રહ્યા હતા. આ બેઠકમાં કેપ્ટન રોહિત શર્મા, કોચ ગૌતમ ગંભીર અને ચીફ સિલેક્ટર અજિત અગરકર પણ હાજર રહ્યા હતા. વધુમાં પ્રભતેજ ભાટિયાને બોર્ડના નવા ખજાનચી બનાવવામાં આવ્યા હતા.

આ પણ વાંચો: ઇંગ્લેન્ડ વિરૂદ્ધ T20 સીરિઝ માટે ટીમ ઈન્ડિયાની જાહેરાત, 14 મહિના બાદ શમીની વાપસી

ઋષભ પંત સૌથી મોંઘો ખેલાડી

ઋષભ પંતે આઈપીએલ હરાજીના ઇતિહાસમાં સૌથી મોંઘા ખેલાડીનો રેકોર્ડ બનાવ્યો. લખનઉં સુપર જાયન્ટ્સે તેમને 27 કરોડ રૂપિયામાં ખરીદ્યો. શ્રેયસ અય્યરની કપ્તાનીમાં ગત વર્ષ કોલકાતા નાઇટ રાઇડર્સ આઈપીએલ ચેમ્પિયન બની હતી. તેણે પંજાબ કિંગ્સને 26.75 કરોડ રૂપિયામાં ખરીદ્યો. આનાથી તે લીગના ઈતિહાસમાં બીજો સૌથી મોંઘો ખેલાડી બની ગયો.